खोज

समाचार सारांशमा

• ---

  जुम्लाको सिञ्जा र तिला गाउँपालिकाबाट ल्याइएको अर्ग्यानिक स्याउले तम्घासमा राम्रो बजार पाएको छ ।

  

• ---

  स्याउको मूल्य बजारमा प्रति किलो २०० देखि २५० रुपैयाँ सम्ममा बिक्री भइरहेको छ ।

• ---

  व्यवसायी जगतबहादुर साहीसहित चार जना व्यवसायीले मिलेर करिब ५० क्विन्टल स्याउ तम्घास बजारमा बिक्रीका लागि ल्याएका हुन् ।

  ---

गुल्मी, १४ भदौ । 

जिल्लाको सदरमुकाम तम्घास बजारमा यति बेला जुम्लेली स्याउले राम्रो बजार पाएको छ । जुम्लाबाट ल्याइएको अर्ग्यानिक स्याउ यति बेला सदरमुकाम तम्घासका चोक र पसलहरूमा बिक्रीका लागि राखिएको छ ।

जुम्लाको सिञ्जा र तिला गाउँपालिकाका विभिन्न स्थानबाट सङ्कलन गरिएको स्वादिलो र विषादी रहित स्याउले यहाँका उपभोक्ताहरूको मन जित्न सफल भएको छ ।

व्यवसायी जगतबहादुर साहीका अनुसार अघिल्लो वर्ष जस्तै यस वर्ष पनि करिब ५० क्विन्टल अर्ग्यानिक स्याउ बिक्रीका लागि तम्घास बजारमा ल्याइएको बताए । साही सहित चार जना व्यवसायीले मिलेर जुम्लाको अर्ग्यानिक स्याउ गुल्मी ल्याई पु¥याएका हुन् ।

बजारमा प्रति किलो स्याउ दुई सय रुपैयाँदेखि दुई सय ५० रुपैयाँमा बिक्री हुँदै आएको छ । व्यवसायीहरूले तम्घास बजारको खानि गाउँ स्थित भगवती मन्दिर नजिकै सटर भाडामा लिएर स्याउ बिक्री गर्न थालेका हुन ।

व्यवसायी साहीले अघिल्लो वर्ष करिब ५० क्विन्टल जति स्याउ बिक्री गरेको बताए । यस वर्ष पनि सोही मात्रामा स्याउ बजारमा ल्याएको जानकारी दिए ।  जुम्लाका किसानहरूले विगतदेखि नै अर्ग्यानिक खेतीमा जोड दिँदै आएका छन् ।

हिमालको चिसो वातावरणमा विषादी रहित खेती गर्ने परम्परागत शैलीका कारण जुम्लाको स्याउ भनेपछि जताततै ब्रान्ड नै बनिसकेको छ । त्यहाँका अधिकांश किसानहरूले व्यावसायिक रूपमा स्याउ खेती गर्दै  आइरहेका छन् ।

स्याउ हिमाली भेगबाट ल्याउँदा लामो दुरी र कठिन भौगोलिक अवस्थाका कारण ढुवानी खर्च महँगो पर्ने गर्दछ । ढुवानीका कारण बजारसम्म आइपुग्दा स्याउको मूल्य महँगो परे पनि उपभोक्ताहरूले खोजी खोजी किन्ने गर्दछन् ।

आजको समयमा स्वास्थ्यप्रति सचेत नागरिकहरू अर्ग्यानिक उत्पादनप्रति बढी रुचि राख्छन् । जुम्लाको स्याउमा विषादी वा रासायनिक मल प्रयोग नगरिने हुँदा यो स्वास्थ्यका दृष्टिले पनि निकै राम्रो गुणस्तर र सुरक्षित मानिन्छ ।

त्यसै कारणले यहाँका स्थानीय ग्राहकहरूको रोजाइमा जुम्लेली स्याउ पर्दछ । जुम्लाबाट स्याउ ल्याउन ढुवानी खर्च धेरै पर्न जाने हुँदा बजारमा यसको मूल्य थोरै महँगो पर्ने गरेको साहीले बताए । उनले उपभोक्ताहरूको माग अनुसार पहिलो पटक सकिनासाथ पुनः दोस्रो लट स्याउ ल्याउने तयारी गरेको बताएका छन् ।