खोज

समाचार सारांशमा

• ---

  तानसेन नगरपालिका र अन्य वडामा सामाजिक सुरक्षा परिचय पत्र नवीकरण गर्न सर्वसाधारणलाई सास्ती ।

  

  ---

• सर्भर बिग्रिएका कारण व्यक्तिगत घटना दर्ता, नागरिकताको सिफारिस र कर तिरो लगायतका सेवामा बाधा ।

  ---

• भदौ मसान्तसम्म अनिवार्य नवीकरणको म्यादका भएका कारण वडाहरूमा ज्येष्ठ नागरिक, असहायहरूको भिड ।

  ---

पाल्पा, १३ भदौ  ।

तानसेन नगर पक्लुवाकी सरिता घिमिरेले आफ्नो आमाको सामाजिक सुरक्षा परिचय पत्र नवीकरणका लागि एक हप्ता सम्म वडा कार्यालय धाउँदा पनि नवीकरणको काम पुरा भएन ।

अर्गलीकी पार्वती विश्वकर्मा पनि दिनहुँ  वडा कार्यालय पुग्दा पनि परिचय पत्र नवीकरण नहुँदा कतै आफू राज्य बाट प्राप्त सुविधा बाट बन्चित हुनुपर्छ कि भन्ने मनमा डर लागेको उनी बताउँछिन् ।

गत आर्थिक वर्षको आफ्नो जमिनको मालपोत बापतको रकम बुझाउनको लागि अघिल्लो वर्षको रसिद लिएर नगरपालिका पुग्दा राजश्व शाखाबाट त्यसै फर्किन परेको कविता कार्की बताउँछिन् ।

एक दिनको एकै घण्टामा हुने कामलाई नगर पालिकाका कर्मचारीले तिरोको लागि फेरी अनावश्यक दुःख दिएको बताउँदै हाम्रा समस्या जनप्रतिनिधिले नबुझेको गुनासो पोखिन ।

पछिल्लो समयमा भएको प्रविधिको बिकासका कारण राजश्व, कर आर्थिक प्रशासन व्यक्तिगत घटना दर्ता, सामाजिक सुरक्षा नवीकरण कम्प्युटरमा अभिलेखीकरण हुने भएकाले पछिल्लो समयमा कम्प्युटरको नचल्दाको समयमा सर्वसाधारणले सास्ती भोग्दै आएका छन् ।

सामाजिक सुरक्षामा आबद्ध सबैले भदौ मसान्त सम्म  अनिवार्य रूपमा नवीकरण गर्नुपर्ने र त्यसैमाथि राष्ट्रिय परिचय पत्र अनिवार्य गरेपछि यतिखेर तानसेनका वडा कार्यालयमा मात्र नभई अन्य स्थानीय निकायका वडाहरूमा समेत सामाजिक सुरक्षाको कार्यक्रमको परिचय पत्र नवीकरणको लागि ज्येष्ठ नागरिक असहायहरूको भिड लागेको छ ।

माथागढी गाउँपालिका बहादुरपुरका स्थानीय परिचय पत्र नवीकरणका लागि एक हप्ता सम्म वडा कार्यालय धाएको बताउने बुद्ध बहादुर दर्लामी भन्दछन् वडामा गयो सचिवले प्राविधिक समस्याका कारण  ६ दिन सम्म काम भएन भने सातौ दिन मात्र काम भएको उनले बताए ।

पछिल्ला वर्षहरूमा वडा तह देखि नै सर्भर (सूत्र ) प्रणाली बाट व्यक्तिगत घटना देखि नागरिकताको सिफारिस सम्म सबै कम्प्युटर बाटै काम हुने भएको छ । विगत एक महिना यता सर्भर (सूत्र) मा समस्या देखिएका कारण सर्वसाधारणले दुःख पाउनु परेको हो ।

तानसेन नगर सरकारका प्रतिनिधि तथा वडा अध्यक्ष सागर महर्जन भन्दछन् कर सूत्र प्रणाली, आर्थिक प्रशासनको सर्भर, महालेखा परीक्षणको कार्यालय, व्यक्तिगत घटना दर्ता, गृह मन्त्रालय अन्तर्गत पञ्जिकरण महाशाखा, सामाजिक सुरक्षाको सर्भर (सूत्र) गृह मन्त्रालय बाट वडा तहसम्म भएको छ ।

आमजनताको काम छिटो, सजिलो र पारदर्शी रूपमा होस भन्नका लागि जोडिएको सफ्टवेयरलाई अमेरिकी सरकारको यु एसआइडीले सहयोग गरेको थियो । युएसआइडी परियोजनाका लागि प्राप्त सहयोग रोकिएका कारणले यो समस्या भएको हो ।

सामाजिक सुरक्षा कार्यक्रम अन्तर्गत परिचय पत्र नवीकरण भन्दा त अझ जटिल र झन्झट त जग्गाको अभिलेखीकरणमा छ । स्थानीय तहको निर्वाचन लगत्तै नगर सरकारले प्राविधिकहरूलाई अतिरिक्त सुबिधा दिएर घर घरमा अभिलेखीकरणका लागि पठायौँ तर अहिले सूत्रमा समस्याका भएका कारण केही भेटिँदैन ।

फेरी अब शून्य बाट सुरु गर्नुपर्ने हुन्छ । यसले थप समस्या पारेको छ । पुरानो बन्द नयाँ कमजोर भयो उनले भने । यो समस्या सबै स्थानीय तहमा देखिएको छ । पहिलाको सफ्टवेयर बनाउँदा कम क्षमताको बनाए । अहिले काम गरेन ।

यो विषयमा पूर्ण ज्ञान भएका जिल्ला तहमै प्राविधिक छैनन् । हामीले समस्या राख्ने ठाउँमा फोन गर्दा फोन उठ्दैन । यसका लागि सिङ्गो नेपाल सरकार नै संवेदनशील बन्नु पर्ने स्थानीय सरकारका कर्मचारीहरू बताउँछन् ।

सर्भर चल्दैन, सेवाग्राहीले बुझ्दैनन् । कर्मचारीले काम गर्दैनन् दुःख दिन मात्र जानेका छन् भन्ने जन गुनासो सुन्नु पर्दछ भन्ने दुखेसो कर्मचारीहरूले बताउँछन् ।   दश स्थानीय तहमा सामाजिक सुरक्षा कार्यक्रममा ५० हजार भन्दा बढी जनता समाहित भएका छन् ।

त्यसै गरी व्यक्तिगत घटनाको दर्ता, विवाह मृत्यु बसाइँ सराइका लागि पनि उत्तिकै भिड लाग्दछ वडा कार्यालयमा तर सर्भर नचलेका कारण काम एकै दिनमा हुँदैन ।

यही समस्याका कारण यहाँका अभिकाश वडाहरूमा बिहान बेलुका र बिदाका दिनमा पनि टोल टोलमा पुगेर व्यक्तिगत घटना दर्ता परिचय पत्रको नवीकरणको काम गरेका छन् ।