खोज

सुनवल, १३ भदौ  ।
नेकपा एमाले सम्बद्ध उखु उत्पादक किसान सङ्घ पश्चिम नवलपरासीले उखु कृषकलाई उपलब्ध गराउँदै आएको अनुदान रकम यथावत् कायम गरि तत्कालै गत वर्षको अनुदान रकम निकासा गर्न माग गरेको छ ।

आज जिल्ला प्रशासन कार्यालय मार्फत प्रधानमन्त्री केपि शर्मा ओलीलाई ज्ञापन पत्र पठाउँदै सङ्घले बजेट अभाव देखाएर अनुदान रकम कटौती गर्ने विषय न्यायसङ्गत नदेखिएको ठहर गरेको छ ।

उखु खेतीमा अनुदानको व्यवस्था भएपछि उत्पादन वृद्धि भएकाले चिनी र चिनीजन्य पर्दाथको बिक्रीबाट सरकारले तिन अर्ब बढी राजश्व वार्षिक प्राप्त गर्ने भएकाले त्यसको करिब आधा रकमले अनुदान वितरण गर्न पुग्ने सङ्घको भनाई छ ।

भुक्तानी नपाउँदा किसानलाई मलखाद, बीउ बिजन खरिद तथा ऋण तिर्न समस्या भएको भन्दै सङ्घले प्रधानमन्त्रीको ध्यानाकर्षण गराएको अखिल नेपाल किसान महासङ्घ स्थायी कमिटी सदस्य राजन कुमार आचार्यले बताए ।

यस्तै, सङ्घले आगामी वर्षको आधार मूल्य समयमै घोषणा गर्न, किसानलाई दिनुपर्ने अनुदान रकम तुरुन्त वितरण गर्न र उद्योगीबाट किसानलाई ठगिने वातावरण रोक्ने व्यवस्था मिलाउन माग गरेको छ ।

एमाले जिल्ला कमिटी अध्यक्ष दीपेन्द्र कुमार अधिकारीले केन्द्रमा चल्दै आएको किसानहरूको आन्दोलनप्रति ऐक्यबद्धता जनाउँदै जिल्ला बाट समेत थप दबाब सृजना गर्न प्रधानमन्त्रीको ध्यानाकर्षण गराइएको बताए । उखु किसानहरू विगत छ दिन देखि काठमाडौँ केन्द्रित आन्दोलन गरिरहेका छन् ।