खोज

बुटवल, १३ भदौ ।

अख्तियार दुरुपयोग अनुसन्धान आयोगले नापी कार्यालय भैरहवाका प्रमुख तथा नापी अधिकृत सुग्रीव यादवविरुद्ध भ्रष्टाचार मुद्दा दायर गरेको छ। यादवसँगै उनकी श्रीमती गायत्री यादव, छोराहरू सुधान्सु यादव र शुभम यादवलाई समेत प्रतिवादी बनाइएको छ। आयोगले शुक्रबार विशेष अदालत काठमाडौंमा आरोपपत्र दायर गरेको हो।

आयोगका अनुसार सार्वजनिक पदमा २०५३ असार १३ गतेदेखि २०८१ असार १६ गतेसम्मको अवधिमा यादवले कुल नौ करोड तीन लाख ९५ हजार ४४४ रुपैयाँ आर्जन गरेको देखिएको छ। तर सोही अवधिमा उनले १४ करोड ८३ लाख ५७ हजार ८८४ रुपैयाँ बराबरको सम्पत्ति खर्च तथा लगानी गरेका थिए। यसरी करिब पाँच करोड ७९ लाख ६२ हजार ४४० रुपैयाँ बराबरको सम्पत्तिको स्रोत पुष्टि गर्न नसकेकाले गैरकानुनी रूपमा आर्जन गरिएको ठहर आयोगले गरेको छ।

आरोपपत्रमा गैरकानुनी सम्पत्ति जफत गर्न र सोही बराबरको रकम बिगो मागदाबी गर्नुपर्ने उल्लेख गरिएको छ। अख्तियारले जारी गरेको प्रेस विज्ञप्तिमा भनिएको छ–
“प्रतिवादी सुग्रीव यादवले सार्वजनिक पदमा रहँदाका समयमा अख्तियारको दुरुपयोग गरी गैरकानुनी रूपमा सम्पत्ति आर्जन गरेका छन्। स्रोत नखुलेका सम्पत्तिहरू श्रीमती गायत्री यादव र छोराहरू सुधान्सु यादव तथा शुभम यादवका नाममा दर्ता भएकाले उनीहरूलाई समेत प्रतिवादी बनाई भ्रष्टाचार निवारण ऐन, २०१७, भ्रष्टाचार निवारण ऐन, २०५९ र अख्तियार दुरुपयोग अनुसन्धान आयोग ऐन, २०४८ का सम्बन्धित प्रावधानअनुसार जफत प्रक्रिया अघि बढाइएको छ।”

यससँगै विशेष अदालतले अब मुद्दाको सुनुवाइमार्फत यादव परिवारविरुद्ध कानुनी प्रक्रिया अघि बढाउनेछ।