खोज

लमही, १३ भदौ ।

दाङको नेपाल–भारत सीमा कोइलावास नाकाबाट शान्ति पुनर्स्थापना गृह कोइलावासले ५ वर्षमा १ सय ११ जना महिला तथा बालबालिकाहरूको उद्धार गर्न सफल भएको छ ।

मानव बेचबिखन तथा ओसारपसार र नियन्त्रण गर्ने अभियानका लागि २०७७ चैत ४ देखि स्थापना भएको सो संस्थाले स्थानीय सरकार र नेपाल प्रहरीसँगको समन्वय सहकार्यमा विभिन्न वाहानामा छिमेकी मुलुक भारतमा बेचबिखनमा परेका र भारततर्फ लैजाँदै गरेका नेपाली महिला तथा बालबालिकाहरूको उद्धार गरेको शान्ति पुनर्स्थापना गृह कोइलावासका परामर्शदाता सीमा जिसीले जानकारी दिइन् ।

शान्ति पुनर्स्थापना गृह कोइलावास कार्यालयको तथ्याङ्क अनुसार २०७७/०७८ मा १०४ जनालाई परामर्श प्रदान गरिएको र २ जनालाई उद्धार गरिएको, २०७८/०७९ मा १ हजार ५४ जनालाई परामर्श सेवा प्रदान गरिएको, २८ जनालाई उद्धार गरिएको, भारतबाट ३ जनाको उद्धार गरिएको र बेचबिखनमा संलग्न १ जनालाई मुद्दा चलाइएको छ ।

त्यसैगरी २०७९/०८० मा ७ सय ९५ जनालाई परामर्श सेवा प्रदान गरिएको, २३ जनालाई उद्धार गरिएको र १ जनालाई भारतबाट उद्धार गरिएको, २०८०/०८१ मा ७ सय ३१ जनालाई परामर्श सेवा प्रदान गरिएको २८ जनालाई उद्धार गरिएको र भारतबाट १ जनाको उद्धार गरिएको तथा १ जना अन्य संस्थाको जिम्मा लगाइएको पाइएको छ भने आर्थिक वर्ष २०८१/०८२ को असार मसान्ता सम्ममा ८ सय ७९ जनालाई परामर्श सेवा दिइएको छ ।

भने ३० जनालाई उद्धार गरिएको, भारतबाट १ जनालाई उद्धार गरिएको, १ जनाका विरुद्ध मुद्दा चलाइ १ जना अन्य संस्थाको जिम्मामा दिइएको तथ्याङ्क पाइएको छ ।  कोइलावासको कार्यालय मार्फत गत आव मा मात्र दाङका २० जना, प्युठानका २ जना र कपिलवस्तु, नवलपरासी, सुर्खेत, सङ्खुवासभा तथा दैलेखका १/१ जना तथा बलरामपुर र सिद्धार्थनगर भारतका ३ जना गरि ३० जनाको उद्धार गरिएको हो ।

शान्ति पुनर्स्थापना गृहको स्थापना भएपश्चात् पाँच वर्षमा कुल ३ हजार ५ सय ६३ जना महिला तथा बालबालिकाहरूलाई सचेतना परामर्श प्रदान गरिएको, १ सय ११ जनाको उद्धार गरिएको जसमध्ये ६ जना भारतमा बेचिएकाको उद्धार गरिएको २ जना अन्य संस्थाको जिम्मामा बुझाइएको र २ जना बेचबिखनमा संलग्नलाई मुद्दा चलाइएको छ ।

बिशेष गरि नेपाल भारत सीमासँग जोडिएका नेपालका ८ जिल्लाहरूमा यस संस्थाका शाखा कार्यालयहरू रहेका र केन्द्रीय कार्यालय भने ललितपुरको गोदावरीमा २०५० सालमा स्थापना गरिएको संस्थापक अध्यक्ष शान्ता सापकोटाले बताइन ।

जसमध्ये कैलाली, कपिलवस्तु, दाङ, ललितपुर, बाँके, बर्दिया, रुपन्देही, जनकपुर र कञ्चनपुर महेन्द्रनगरमा यसका कार्यालयहरू सञ्चालनमा रहेका केन्द्रीय अध्यक्ष शान्ता सापकोटाले जानकारी दिइन ।

जघन्य अपराधका रूपमा रहेको मानव बेचबिखन र ओसारपसार लाई नियन्त्रण गर्ने, बेचबिखनका कारक तत्त्वहरूलाई पहिचान गरी न्यूनीकरणका लागि सचेतना तथा परामर्श अभियानहरू सञ्चालन गर्दै आएको छ ।

बेचबिखनमा परेका महिला तथा बालबालिकाहरूको उद्धार गर्ने, सुरक्षित आवासको व्यवस्थापन गर्ने, कानुनी तथा मनोसामाजिक परामर्श प्रदान गर्ने, अभियुक्तहरूको खोजी गरी मुद्दा चलाउने गरिएको छ ।

उद्धार गरिएका नागरिकहरूलाई नेपाल प्रहरी, स्थानीय सरकार र सङ्घसंस्थाहरू सँगको समन्वयमा पारिवारिक पुनर्मिलन गराउने यस संस्थाको उद्देश्य रहेको राष्ट्रिय उद्धार संयोजक भूमिराज भट्टराईले बताए ।

विशेषतः नेपाल भारत सीमा क्षेत्रका वर्डरहरूबाट महिला तथा बालबालिकाहरूलाई विभिन्न बहानामा भारतमा लैजाने र उनीहरूलाई बेचबिखन गर्ने क्रियाकलापलाई नियन्त्रण र निरुत्साहित गर्न यस संस्थाले सीमा क्षेत्रहरूमा माइती नेपालले जस्तै काम गर्दै आइरहेको छ ।

लुकिछिपी चोर बाटोबाट भारतमा वेचिएका महिला तथा बालबालिकाहरूको विभिन्न च्यानल मार्फत उद्धार गरी स्वदेश फिर्ता गर्न यस संस्थाले महत्त्वपूर्ण भूमिका खेल्दै आएकोले यसको अभियानलाई सार्थक बनाउन नेपाल सरकारका सरोकारवाला निकायहरू लगायत सबैको साथ सहयोग र सक्रियता आवश्यक रहेको गढवा गाउँपालिका वडा नम्बर ८ का अध्यक्ष अब्दुल खालिक सिद्दिकीले बताउँछन् ।