खोज

बुटवल –१०, रुपन्देही ।

कालिका मानवज्ञान मा.वि.मा मोती जयन्तीको अवसरमा गजल प्रशिक्षण कार्यक्रम सम्पन्न भएको छ। नेपाली साहित्यमा गजल विधा भित्र्याउने मोतिराम भट्टको जन्मजयन्तीलाई स्मरण गर्दै कालिका साहित्य क्लबले कार्यक्रम आयोजना गरेको हो।

कार्यक्रममा कवि, गजलकार तथा प्राध्यापक डाक्टर श्यामप्रसाद न्यौपानेले गजल लेखनका विविध आयामबारे प्रशिक्षण दिएका थिए। उनले विद्यार्थीलाई सिर्जनशील लेखन अभ्यासमा निरन्तर लागिरहन आग्रह गरे।

विद्यालयमा अध्ययनरत करिब ५० जना साहित्यानुरागी विद्यार्थीहरूको सहभागिता रहेको कार्यक्रममा आफ्नै सिर्जनाहरू प्रस्तुत गरिएको थियो। विद्यार्थीहरूले गजल वाचन गर्दै आगामी दिनमा अझ सिर्जनशील बन्ने प्रतिबद्धता जनाए।

सो अवसरमा विद्यालयका प्रधानाध्यापक दिनेश थापाले विद्यार्थीलाई सिर्जनशील र साहित्यप्रेमी बनाउन विद्यालयले यस्ता कार्यक्रमलाई निरन्तरता दिइरहेको बताए। विद्यालय व्यवस्थापन समितिका अध्यक्ष नित्यानन्द ज्ञवालीले विद्यार्थीहरूको साहित्यिक यात्रामा सफलताको शुभकामना दिए। यस्तै, गजलकार तथा शिक्षक युवराज कडेलले कार्यक्रममा सहभागी विद्यार्थीहरूबाट भविष्यमा थुप्रै सक्षम गजलकार जन्मिने अपेक्षा व्यक्त गरे।

कार्यक्रमको सहजीकरण अतिरिक्त क्रियाकलाप संयोजक विवेकराज पोखरेलले गरेका थिए। सोही दिन विद्यालयमा प्रथम त्रैमासिक परीक्षाको नतिजा पनि सार्वजनिक गरिएको थियो। साथै, नेपाल नियमित रक्तदाता संघ, रूपन्देही शाखा र विद्यालयको संयुक्त आयोजनामा रक्तदान कार्यक्रम सम्पन्न गरिएको विद्यालयले जनाएको छ।