खोज

बुटवल, ७ भदौ ।
रुपन्देही ईभेन्टस ब्यवसायी संघले आफना ब्यवसायीहरुलाई एक दिने ट्राफिक सचेतना सम्बन्धि प्रशिक्षण तथा अन्तरक्रिया कार्यक्रम गरेको छ । साना सवारी प्रयोग हुने ब्यवसायीहरुलाई ट्राफिक नियमकानुनबारे ज्ञान दिने गरि नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, बुटवलको सहकार्यमा संघले शनिबार कार्यालय परिसरमा ट्राफिक सचेतना तथा अन्तरक्रिया कार्यक्रम गरेको हो ।

कार्यक्रममा नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, बुटवलका प्रहरी निरिक्षक गोपाल रायमाझीले ऐनकानुनलाई सबैबाट मान्न जरुरी रहने भन्दै समस्याको समाधानका उपायहरु अप्नाउन सुझाव दिए । सामान्यतया ब्यवसायीहरुलाई कुर्सीहरु नखस्ने गरि बाध्ने, लामा पाईपहरुमा अघिपछि दुबैतर्फ रातो कपडा बाध्ने जस्ता सुरक्षाका उपायहरु अप्नाउन उनले सुझाव दिए । सामान बोक्न गरि तयार भएको पिकअप भ्यानको प्रयोग लेभर बोक्न प्रयोग गर्न नहुने तर्क दिए । सवारी साधनहरु नबिकरण नहुने सबैभन्दा ठुलो समस्या रहेको उनले बताए । ‘हामीहरु पनि ऐननियम र नियमावलीमा बाधिएका छौ ।’–उनले भने । सवारी तथा यातायात ब्यवस्था ऐन २०४९ र नियमावली २०५० मा रहेर ट्राफिक व्यवस्थापन कार्यालयले कार्यान्वयन गर्दै आएको बताए । शहरी क्षेत्रमा शुभकार्य र दिवंगत घरमा टेन्ट लगाउने गरिदा त्यसको ढुवानीमा ब्यवसायीहरुमा कठिनाई रहेको उनले स्वीकारे । कुनै समय दुर्घटनामा मानविय क्षति हुने संख्या धेरै भएको भन्दै उनले पछिल्लोसमय यसमा न्युनिकरण भएको उनले दाबी गरे । ‘छतमा यात्रु चढाउन रोक्दा सफल भएको हौ ।’– उनले भने । ओभरलोडका कारण सडक र पुल भत्किने र कमजोर हुने अवस्था आएको हुदा यसमा नियन्त्रणलाई प्राथमिकता दिएको उनले बताए ।

कार्यक्रममा कार्यालयका प्रहरी वरिष्ठ नायव निरिक्षक ज्ञानु पाण्डेले सवारी दुर्घटनाको वर्तमान अवस्था र यसको न्युनिकरणबारे जानकारी दिए । उनले सवारी हाक्दा कुन क्षेत्र, कस्तो अवस्थामा छ भन्ने कुरा चालकको ध्यान जान जरुरी हुने बताए । सामग्री लिएर हिड्दा सवारीको अवस्था अनुसारको तौल, सुरक्षाको चिन्हको प्रयोग, पार्किङजस्ता कुराहरुमा ध्यान दिन जरुरी रहने उनले बताए । कानुनी कुरा क्षम्य नहुने उनले तर्क दिदै उनले जोखिमलाई रोक्ने गरि लाग्नुपर्ने बताए । चालकबाट हुने गल्तीको कारण हुने दुर्घटनाको दोषी सवारीधनि पनि हुने भन्दै समयमा नै यसमा ध्यान दिनुपर्ने सुझाव उनले दिए । उनले सवारी ओभरटेकको अवस्था, हेडलाईट र फोकस लाईटको प्रयोग जस्ता विषयमा जानकारी दिए ।
कार्यक्रममा रुपन्देही निर्माण ब्यवसायी संघ बुटवल शाखाका अध्यक्ष बुद्धिराज थापा, रुपन्देही क्याटरिङ तथा मिष्ठान ब्यवसायी संघका अध्यक्ष कमल पोखरेलले जोखिम रोक्ने र ब्यवसाय सहज हुने गरि लाग्न आग्रह गरे ।

कार्यक्रममा संघका अध्यक्ष किरण श्रेष्ठले सरोकारवाला निकायहरुसंग सहकार्य र सहजिकरण हुने गरि अन्तरक्रिया कार्यक्रम गरिएको भन्दै ब्यवसायलाई चलायमानसंगै सुरक्षा विधिहरु अप्नाउन जरुरी रहेको बताए । ट्राफिक नियम कानुनबारे बुझ्न र ब्यवसायमैत्री बनाउन उनले आग्रह गरे ।
कार्यक्रममा संघका उपाध्यक्ष मोहमद ईसरार, सचिव दुर्गेश गुप्ताले टेन्टको पाईपको लम्बाई नै १८ फिट हुने र त्यो ढालाभन्दा माथि जाने हुने त्यसकै कारण जरिवाना तिर्नुपर्ने बाध्यता रहेको भन्दै कानुनी बाध्यतासंगै समाजमा ब्यवहारिकतालाई कार्यान्वयन गर्न आग्रह गरे ।
कार्यक्रम संयोजक कोषाध्यक्ष महेश पौडेलले ब्यवसायीहरुको हकहित र सुरक्षाका विषयमा संघबाट निरन्तर अभियानहरु चलाउने बताए । संघमा एक सय बढी ब्यवसायीहरु आवद्घ रहेका छन ।