खोज

बर्दिया, ६ भदौँ ।

बारबर्दिया नगरपालिकामा पालिका स्तरीय शिक्षा कचहरी कार्यक्रम सम्पन्न भएको छ । वास गेन्स परियोजनाको आयोजना र बारबर्दिया नगरपालिका को सहकार्यमा वडा नं. ४, पदनाहस्थित पाञ्चजन्य माध्यमिक विद्यालयमा उक्त कार्यक्रमको आयोजना गरिएको हो ।

वास गेन्स परियोजना तेस्रो वर्षमा प्रवेश गरेसँगै विद्यालयमा गुणस्तरीय शिक्षा सुनिश्चित गर्न प्रत्येक वर्ष संस्था ले शिक्षा कचहरी सञ्चालन गर्दै आए को परियोजना संयोजक जगदीश प्रसाद थारूले जानकारी दिएका छन् ।

कार्यक्रममा विद्यालयमा शैक्षिक गुणस्तर वृद्धि गर्ने उपायहरूसँगै सरसफाइ, खानेपानी र स्वच्छता सुधारका विषयमा विस्तृत छलफल भएको थियो ।

सहभागीहरूले विद्यालय शिक्षामा देखिएका चुनौतीहरू, सरसफाइको अवस्था, खानेपानीको अभाव, स्वच्छता सामग्रीको कमी लगायतका समस्या र तिनको दिगोपना समाधानबारे आफ्ना सुझाव प्रस्तुत गरेका थिए ।

सहभागीबाट उठाइएका प्रश्नहरूको सम्बोधन गर्दै पालिका प्रमुख छविलाल थारू र प्रशासकीय अधिकृत टिकानाथ गोसाईंले विद्यालय सुधार, शैक्षिक गुणस्तर वृद्धिका लागि पालिकाले गरिरहेका प्रयास तथा आगामी योजनाबारे जानकारी गराए ।

उनीहरूले शिक्षा मात्र नभई सरसफाइ, खानेपानी र स्वच्छता जस्ता आधारभूत आवश्यकता पूरा नगरी गुणस्तरीय शिक्षा दिन नसकिने भएकाले पालिकाले यी विषयलाई प्राथमिकतामा राखेर काम गर्दै आएको बताए ।

कार्यक्रममा सहभागी प्रतिनिधिहरूले विद्यालय शिक्षामा सुधार ल्याउन शिक्षकहरूको क्षमता अभिवृद्धि, विद्यार्थीमैत्री वातावरण, बालबालिकामा अनुशासन र नियमितताको विकास, शौचालय र सुरक्षित खानेपानीको व्यवस्था, किशोरीमैत्री कार्यक्रम, र सरसफाइ सामग्रीको उपलब्धताजस्ता पक्षलाई मुख्य रूपमा जोड दिए ।

शिक्षा कचहरीले विद्यार्थी, शिक्षक, विद्यालय व्यवस्थापन समिति, बाल क्लब र किशोरी क्लबका प्रतिनिधिहरूलाई एउटै मञ्चमा ल्याएर प्रत्यक्ष छलफल गर्ने अवसर दिएको सहभागीहरूले बताएका छन् ।

कार्यक्रमले विद्यार्थी र समुदायले भोगिरहेका समस्या जनप्रतिनिधि तथा सम्बन्धित निकायमाझ प्रत्यक्ष आफ्ना कुराहरू राख्ने वातावरण सिर्जना गरेको भन्दै उनीहरूले कार्यक्रम प्रभावकारी भएको बताएका छन् ।

शिक्षा कचहरी कार्यक्रममा नगरपालिकाका जनप्रतिनिधि, विषयगत शाखाका प्रमुख, विद्यालयका प्रधानाध्यापक, शिक्षक, व्यवस्थापन समिति, विद्यार्थी, बाल क्लब र किशोरी क्लबका प्रतिनिधिहरूको उल्लेखनीय सहभागिता रहेको थियो ।

सहभागीहरूले यस्तो कार्यक्रमलाई निरन्तरता दिनुपर्नेमा जोड दिँदै शिक्षा क्षेत्रको सुधारका लागि सामूहिक प्रयास आवश्यक भएको बताएका छन् ।