खोज

तिलोत्तमा, ६ भदौ।

रुपन्देहीको तिलोत्तमास्थित ब्रिटिस एजुकेसन ग्रुपद्वारा सञ्चालित ब्रिटिस ग्रामर स्कुल (नमस्ते एकेडेमी) मा हरितालिका तीज पर्वको अवसरमा विविध सांस्कृतिक प्रस्तुति, सुपर प्यारेन्ट्स डान्स र दरसहित विशेष तीज महोत्सव भव्य रुपमा सम्पन्न भएको छ ।

नेपालीहरूको मौलिक संस्कृतिलाई जगेर्ना गर्दै बालबालिका, अभिभावक र विद्यालयबीच आपसी आत्मीयता सुदृढ गर्ने उद्देश्यसहित आयोजित कार्यक्रममा विद्यार्थी तथा अभिभावक दुवैले आ–आफ्ना प्रतिभा प्रस्तुत गरेका थिए ।

ब्रिटिस एजुकेसन ग्रुपका कन्ट्री डाइरेक्टर तथा स्कुल हेड अरुणकुमार कँडेलले तीज महोत्सवलाई मौलिक संस्कृति जोगाउने महत्त्वपूर्ण अवसरका रूपमा प्रस्तुत गर्दै भने, “साहित्य र संस्कृति समाजका ऐना हुन्, बालबालिका तिनका बिम्ब हुन् । यस्ता कार्यक्रमले विद्यार्थीलाई सृजनशील मात्र होइन, जीवन बुझ्ने र सफलताको बाटो पहिल्याउने अवसर पनि दिन्छन् ।”

विद्यालयका संस्थापक प्राचार्य राजेन्द्र कुँवरले सुपर प्यारेन्ट्सलाई दर र मायाको चिनोका साथ सम्मान गर्दै अभिभावकको सहभागिता नै विद्यालयको विशेष पहिचान भएको बताए ।

महोत्सव दुई चरणमा सम्पन्न भयो । पहिलो चरणमा प्रि–प्राइमरीदेखि कक्षा १० सम्मका विद्यार्थीहरूले तीज गीत, नृत्य, भेषभूषा र कला–संस्कृति प्रस्तुत गरेका थिए । दोस्रो चरणमा भने अभिभावकले आफ्ना सन्तानसँगै स्टेजमा नृत्य प्रस्तुत गर्दै दर्शकलाई मोहित पारे ।

कार्यक्रम संयोजक रोमा शर्माका अनुसार, “यसपटक ५० भन्दा बढी अभिभावकले सुपर प्यारेन्ट्स डान्स प्रतियोगितामा सक्रिय सहभागिता जनाएका थिए भने ४०० भन्दा बढी दर्शक–अभिभावकको उपस्थिति रहेको थियो ।”

सुपर प्यारेन्ट्स डान्स प्रतियोगितामा सहभागी अभिभावकहरूले आफ्ना बालबालिकासँगै नृत्य गर्दै पारिवारिक आत्मीयता, सामीप्यता र आपसी सम्बन्ध झल्काएका थिए । दर्शकले ‘प्यारेन्ट्स मात्र नभई सँगसँगै कलाकार पनि हुन्’ भन्ने अनुभूति लिएको देखिन्थ्यो ।

विद्यालयकी निर्देशक पुष्पा कँडेल, संस्थापक प्राचार्य राजेन्द्र कुँवर र स्कुल हेड अरुणकुमार कँडेलको विशेष उपस्थितिमा भएको कार्यक्रममा कक्षा पीजीदेखि कक्षा १० सम्मका विद्यार्थीहरूले सञ्चालन जिम्मेवारी लिएका थिए भने समन्वयमा शिक्षिका अम्बिका अर्याल, पूजा थापा र बसन्ता कोइरालाले सक्रिय भूमिका निर्वाह गरेका थिए ।

ब्रिटिस ग्रामर स्कुल मोफसलकै एक मात्र प्रोग्रेसिभ तथा क्याम्ब्रिज स्कूलको रूपमा चिनिन्छ, जहाँ नियमित पठनपाठनसँगै अतिरिक्त क्रियाकलापलाई पनि पाठ्यक्रमसँगै जोडिएको छ ।

विद्यालयले यही आइतबार कक्षा ११ का नयाँ विद्यार्थीहरूको स्वागत तथा कक्षा १२ उत्तीर्णहरूको ग्रेजुएसन कार्यक्रम टाइगर प्यालेस, बाइ सोल्टीमा आयोजना गर्ने तयारी गरेको छ । सहप्राचार्य उमेश कँडेल र महेश पौडेलका अनुसार, यस वर्ष विद्यालयले व्यवस्थापन संकायमा १०० प्रतिशत र विज्ञान संकायमा ९६ प्रतिशत नतिजा ल्याएर तिलोत्तमा नगरमै पहिलो स्थान हासिल गरेको छ ।