खोज

कपिलवस्तु, ४ भदौ ।

जिल्लाको बिजयनगर गाँउपालिकाको तिन वटा वडामा सञ्चालनमा रहेको सबल बालिका सबल समुदाय परियोजनाको जिल्ला स्तरिय सरोकारवालाहरु संग परिचय तथा कार्यक्रम प्रस्तुतिकरण सम्पन्न गरिएको छ ।

प्लान इन्टर्नेशनल नेपालको आर्थिक सहयोग तथा कपिलवस्तु ईन्ट्रिग्रेटेड डेभलप्मेन्ट सर्विसेज (किडस) साझेदारीमा पालिकाको वडा नम्बर ३, ५ र ६ मा सञ्चालित परियोजना बारेको परिचयात्मक कार्यक्रम स्वास्थ्य कार्यालय कपिलवस्तुको आयोजनामा सम्पन्न गरिएको हो । परिचयात्मक कार्यक्रमका सहभागीले पालिकामा सञ्चालित अन्य सोहि प्रकृतीका परियोजना सँग समन्वय गरि दोहोरोपना नआउने गरि कार्यक्रम सञ्चालन गर्न सुझाव दिए ।

परियोजनाले जोखिममा रहेका र बहिष्कृत बालबालिकाहरू, विशेषगरी बालिकाहरूलाई भेदभाव, डर र कुनै पनि प्रकारको हिंसाबाट मुक्त गराई मूल्यवान् र हेरचाह गर्ने वातावरण निर्माण गर्न केन्द्रित छ । ५ सय ४४ जना प्रत्याभुत बालबालिकामा बढि केन्द्रित भई सञ्चालन गरिएको परियोजनाको चालु आवको ६९ लाख ५५ हजार ६ सय २५ रुपैया स्विकृत बजेट रहेको परियोजनाका संयोजक असगर हुसेन धुनियाले जानकारी दिए ।

पछिल्लो समयमा बिजयनगर गाँउपालिकामा रक्तअल्पत्ताको समस्या बढि देखिएकोमा जिल्लाका सरोकारवालाले चिन्ता व्यक्र गरे । बालबालिकाको पोषणको अवस्था सुधारका लागी सबै पक्षले सहकार्य गरि योजना बनाउनु पर्नेमा जिल्ला समन्वय समिति कपिलवस्तुका प्रमुख बाबुराम आचार्यले जोड दिए । गाउँपालिकामा सञ्चालित परियोजनाको पालिकास्तरको सहकार्य राम्रो रहेको र सो क्षेत्रमा कार्य गर्ने निकाय बिच समन्वय गराउन पालिकाले नेतृत्व गर्दै आएको बिजयनगर गाँउपालिकाका अध्यक्ष गोपाल बहादुर थापाले बताए ।

पोषण सुधारका क्षेत्रमा कार्य गर्ने निकायले दोहोरोपना नआउने गरि पालिकाको समन्वयमा काम गर्न आवश्यक रहेको सहायक प्रमुख जिल्ला अधिकारी पदमलाल लामिछानेको भनाई छ । पोषणको अवस्था सुधारका लागी नागरिक देखी सरोकारवाला सबै सजग हुनु पर्ने अवस्था रहेको स्वाथ्य कार्यालय कपिलवस्तुका प्रमुख गौरब ढकालले बताए ।

रासायनिक बिषादी बारे सचेतना, पोषण सुधारका लागी योजना निर्माण, खुला दिसा मुक्त घोषणाको पुर्ण कार्यान्वयनमा लाग्नु पर्नेमा किड्सका कार्यकारी निर्देशक कृष्ण कुमार द्विवेदी, पत्रकार महासंघ जिल्ला अध्यक्ष डिलाराम भुसाल, खानेपानी सरसफाई डिभिजनका प्रमुख प्रकाश केसी लगायतको सुझाव थियो ।