खोज

बुटवल, ४ भदौ ।
विश्व बन्धुत्व दिवस तथा राजयोगिनी दादी प्रकाशमणीको १८ औ स्मृति दिवसको अवसरमा बह्मकुमारी ईश्वरीय विश्वविद्यालयको आयोजनामा एशियाका विभिन्न देशहरुमा बृहत् रक्तदान अभियान २०८२ गर्ने भएको छ । बुधबार बुटवलमा पत्रकार सम्मेलन गरि भदौ ६, ७, ८ र ९ गते ४ दिने बृहत् रक्तदान कार्यक्रम हुन लागेको बह्मकुमारी ईश्वरीय विश्वविद्यालय नेपालकी सहनिर्देशक कमला दिदीले बताईन । नेपाल, भारतसहित एशियाका देशहरुमा आयोजना हुने कार्यक्रमबाट १ लाख पिन्ट रगत संकलन हुने लक्ष्य रहेको उनले बताईन । ‘बह्मकुमारी ईश्वरीय विश्वविद्यालय अन्तरगत नेपालका १३३ केन्द्रहरुमा रक्तदान कार्यक्रम हुनेछ ।’– उनले भनिन । प्रत्येक वर्ष शिवरात्रीको अवसरमा रक्तदान गर्दै आएको र विभिन्न स्थानबाट आउने रगत माग गर्नेहरुलाई रगत उपलब्ध गराउन मद्यत गरेको उनले स्मरण गरिन ।

कार्यक्रममा केन्द्रीय सचिव राजयोगी बह्मकुमार नरेन्द्र भाइजीले रक्तदानबाट जीवन बचाऔ भन्ने लक्ष्यसहित अभियान हुन लागेको बताए । भदौ ६,७, ८ र ९ गते ४ दिन संचालन हुने कार्यक्रममा नेपालभरिमा गरि १५ हजार भन्दा बढि पिन्ट रगत संकलन हुने उनले बताए । यस क्षेत्रमा ६,७ र ९ गते बुटवलको बह्मकुमारीज क्षेत्रिय कार्यालय परिसर तथा ८ गते देविनगर प्राणगड तथा सैनामैनामा समेत हुने उनले बताए । क्षेत्रिय कार्यालय परिसरमा प्रदेश प्रमुख कृष्ण बहादुर घर्तिबाट उद्घाटन भएसंगै देशभर रक्तदान कार्यक्रम शुरु हुने उनले बताए ।

कार्यक्रममा नेपाल स्वयंसेवी रक्तदाता समाज रुपन्देहीका अध्यक्ष कृष्ण चौहान क्षेत्रीले पछिल्लोसमय रुपन्देहीसहित देशभर नै रगतको अभाव रहेको बताए । मृगौलाका डाईलोसिस गर्ने बिरामी, रक्तअल्पता सहित अन्य धेरै बिरामीहरुको माग रहेको उनले बताए । दैनिकजसो हुने रक्तदान कार्यक्रमसंगै रगतको अभाव समेत रहेको उनले बताए । यो १०० घण्टा रक्तदान कार्यक्रम महत्वपूर्ण हुने उनले बताए । नया रक्तदाता निमार्ण हुनेमा आशा रहेको उनले बताए । रक्तदाताबाट संकलन भएको रगत स्टोरेज गर्न मिल्ने पर्याप्त स्थान रहेको उनले बताउदै पछिल्लोसमय यहाको ब्लड बैकमा ३५ घण्टा पनि रगत स्टोर हुने अवस्था रहेको उनले बताए । अहिलेसम्म हेर्दा ४८ वटा देशमा २९ हजार युनिट रगत संकलन गरेको विश्व रेकर्ड रहेको उनले बताए ।

नेपाल रेडक्रस सोसाइटी रुपन्देहीका मन्त्री टेक बहादुर थापाले यो अभियानमा कार्यालय अन्तरगतका ३० वटा शाखाबाट जनशक्ति र प्राविधिक सहयोग गर्ने प्रतिवद्धता जनाउदै पुण्य काममा रक्तदाता जुटाउनेतर्फ लाग्नुपर्ने बताए ।