खोज

कपिलवस्तु, ३ भदौ

कपिलवस्तु जिल्लामा गँहु उत्पादन बढिरहेको र उत्पादन बढाउन सकिने सम्भाव्यतालाई मध्यनजर गरी जिल्लामा गँहु जोन लागु गर्न माग गरिएको छ ।

राष्ट्रिय कृषि आधुनिकिकरण कार्यक्रम कार्यान्वयन एकाई, कपिलवस्तुले आयोजना आर्थिक वर्ष २०८१÷८२ को सार्वजनिकीकरण तथा आगामी आर्थिक वर्षका कार्यक्रम बारे जानकारी दिन आयोजित कार्यक्रमका सहभागीले सो माग गरें ।

कार्यक्रम कार्यान्वयन एकाई कपिलवस्तुका वरिष्ठ कृषि अधिकृत राकेश कुमार ओझाले जिल्लामा अहिले धान सुपर जोन, तरकारी जोन तथा माछा जोन कार्यक्रम संचालन भएको भन्दै जिल्लामा गँहुको उत्पादन राम्रो भएकाले गँहु जोन कार्यक्रम थप्न आवश्यक रहेको बताए ।

कार्यक्रम लागु भएमा कपिलवस्तु गहँुमा आत्मनिर्भर बन्न सक्ने आधारहरु प्रशस्त रहेको उनको तर्क थियो । कपिलवस्तुको बाणगंगा, कपिलवस्तु, बुद्धभूमि नगरपालिका, मायादेवी गाँउपालिका र शुद्धोधन गाउँपालिका गरी ३४ वटा वडाहरुमा अहिले धान सुपर जोन कार्यक्रम संचालनमा रहेको उनले जनाए ।

यसैगरी तरकारी जोन कार्यक्रम बुद्धभूमि नगरपालिका, कपिलवस्तु नगरपालिका र मायादेवी गाँउपालिकाका १४ वटा वडामा लागु भएको छ भने माछा जोन कार्यक्रम ५ वटा पालिकाका ३९ वटा वडामा संचालित छन् । कपिलवस्तुमा आर्थिक वर्ष २०७३ । ०७४ मा धान जोनका रुपमा स्थापना भई आर्थिक वर्ष २०७५ । ०७६ बाट धान सुपर जोनमा स्तरोन्नती भएको प्रमुख वरिष्ठ कृषि अधिकृत ओझाले स्पष्ट पारे ।

जिल्ला समन्वय समितिका प्रमुख बाबुराम आचार्यले अब जिल्लामा आधुनिक तवरले कृषिको उत्पादन हुनुपर्ने भन्दै कृषिको आधुनिकीकरणमा जोड दिनुपर्ने बताए । जिल्लाका ९६ वटै वडाहरुमा धान सुपर जोन कार्यक्रम लागु गर्न माग गर्दै बढी आम्दानी हुने र उत्पादनको प्रचुर सम्भावना भएको गँहुबालीलाई मध्यनजर गर्दै गँहु जोन कार्यक्रम संचालन गर्नु पर्ने उनको सुझाव थियो ।

कार्यक्रममा जिल्ला समन्वय समिती कपिलवस्तुका उपप्रमुख रमेश कुर्मी, सहायक प्रमुख जिल्ला अधिकारी पदमलाल लामिछाने, जिल्ला समन्वय अधिकारी जर्नादन अधिकारी लगायतले कृषीको जोनको क्षेत्रमा कार्य गर्ने निकाय बिच अन्तर कार्यालय समन्वय गरि प्रभावकारी कार्य सम्पादन गर्न आवश्यक रहेको सुझाव दिए ।

माछा जोन कार्यक्रम अन्तरगत जिल्लामा रहेको ५ वटा ह्याचरी मध्ये २ वटा जीर्ण अवस्थामा रहेकोले अब निर्माण गर्दा दीर्घकालिन योजनाका साथ काम गर्न डाक्टर महेन्द्र यादवले सुझाव दिए ।

कृषकको लागत पनि रहेको र उत्पादन पनि राम्रो हुदाँ समेत भुराहरुको विक्रि वितरणमा समस्यापरेको उनले बताए । कार्यक्रममा विभिन्न पालिकाका कृषि तथा पशुविकास शाखाका प्रमुख, प्राविधिक तथा संचारकर्मीको सहभागिता रहको थियो ।