खोज

बुटवल ।

हिन्दु महिलाहरूको महान् पर्व हरितालिका तीज धार्मिक श्रद्धा, भक्ति र उमङ्गसहित देशैभर मनाइँदै छ । यस दिन महिलाहरू हरित व्रत बसेर भगवान् शिव–पार्वतीको पूजा गर्दै आफ्नो परिवारको दीर्घायु, सुख–शान्ति र समृद्धिको कामना गर्दछन् ।

केवल धार्मिक अनुष्ठान मात्र नभई, तीजलाई महिलाबिच भेटघाट, गीत–सङ्गीत र सांस्कृतिक प्रस्तुतिमार्फत आत्मीयता र बन्धुत्व सुदृढ गर्ने पर्वका रूपमा पनि लिइन्छ ।

यही पर्वको महत्वलाई जोड्दै बुटवल उपमहानगरपालिकाको सबैभन्दा पुरानो टोल विकास संस्था मिलन टोल विकास संस्था, वडा नं. ९ले आइतबार तीज विशेष कार्यक्रम सम्पन्न गरेको छ ।

कार्यक्रमलाई सम्बोधन गर्दै वडा अध्यक्ष प्रदीप श्रेष्ठले तीज केवल संस्कार र परम्परासँग मात्र सम्बन्धित नभई सामाजिक एकता र आत्मीयता प्रवर्द्धन गर्ने महत्त्वपूर्ण पर्व भएको बताए ।

उनले संस्थाले यस किसिमका सांस्कृतिक कार्यक्रममार्फत परम्पराको जर्गेना गर्नु प्रशंसनीय रहेको उल्लेख गरे । सो अवसरमा वडा सदस्यहरू इन्दिरा ज्ञवाली र माया परियार, संस्थाका निवर्तमान अध्यक्ष कमला बस्नेत, पूर्व अध्यक्ष कृष्ण श्रेष्ठ र प्रिया गुरुङ, सल्लाहकार नवराज कुँवरलगायतको उपस्थिति थियो ।

कार्यक्रममा करिब १०० जना महिलाहरूको सहभागिता रहेको संस्थाले जनाएको छ । कार्यक्रममा संस्थाकी अध्यक्ष रुपा बस्यालले मिलन टोल विकास संस्था अन्य टोल विकास संस्थाभन्दा फरक र अग्रणी रहेको बताउँदै यसलाई उपमहानगरकै नमुना संस्था बनाउन निरन्तर प्रयासरत रहेको धारणा राखिन् ।