खोज

लमही , ३ भदौ ।
दाङमा जापनिज इन्सेफ्लाइटिस (जेई) का कारण एक जनाको मृत्यु भएको छ भने थप तीन जनामा सङ्क्रमण पुष्टि भएको छ ।

स्वास्थ्य कार्यालय दाङका किटजन्य सरुवा रोग फोकल पर्सन कमल चन्दका अनुसार राप्ती गाउँपालिका–१ का ६० वर्षीय पुरुषको जेई सङ्क्रमणका कारण निधन भएको हो । साउन १८ गते बिरामी भई बुटवलस्थित अस्पतालमा भर्ना भएका उनको भदौ २ गते उपचारका क्रममा मृत्यु भएको बताइएको छ।

यो चालु आर्थिक वर्षमा जिल्लामा जेई का कारण मृत्यु भएको पहिलो घटना हो। चन्दका अनुसार राप्ती गाउँपालिका–६ का ११ वर्षीय बालक, गढवा गाउँपालिका–६ का ३६ वर्षीय पुरुष र तुलसीपुर उपमहानगरपालिका–१२ की २६ वर्षीय महिलामा समेत जेई सङ्क्रमण पुष्टि भएको छ।

सङ्क्रमितमध्ये राप्ती–६ का बालकको राप्ती आधारभूत अस्पताल कालापानीमा उपचार भई रहेको छ भने अन्य दुई जना जिल्ला बाहिरका अस्पतालमा उपचाररत छन् ।

फोकल पर्सन चन्दका अनुसार लामखुट्टेको टोकाइबाट बच्नु र लामखुट्टे नियन्त्रण गर्नु नै जेई बाट बच्ने मुख्य उपाय हो । यो रोग लागेपछि उच्च ज्वरो, टाउको दुख्ने, बेहोस हुने, बान्ता हुने र शरीर काप्ने जस्ता लक्षण देखिने उहाँले जानकारी दिए।

राप्ती गाउँपालिका स्वास्थ्य शाखा प्रमुख नारायण राउतले सुत्ने बेला मच्छर दानी प्रयोग गर्ने, पूरा बाहुला भएको लुगा लगाउने, घर वरिपरि पानी जम्न नदिने, सरसफाइ गर्ने, लामखुट्टे भगाउने क्रिम प्रयोग गर्ने, बालबालिकालाई जेई को खोप अनिवार्य लगाउने र ज्वरो आएमा वा शंका लाग्नेबित्तिकै स्वास्थ्य संस्थामा जानुपर्ने बताए ।

यसैबिच, राप्ती गाउँपालिकाका विभिन्न वडामा सङ्क्रमित भेटिएपछि त्यहाँका अन्य ज्वरो आएका १६ जना बिरामीको रगत सङ्कलन गरिएको छ। गाउँपालिका स्वास्थ्य शाखाको आयोजनामा र स्वास्थ्य कार्यालय दाङको प्राविधिक सहयोगमा सङ्कलन गरिएका नमुना काठमाडौँस्थित राष्ट्रिय जनस्वास्थ्य प्रयोगशालामा पठाइने बताइएको छ।

सो क्षेत्रमा मङ्गलवार सचेतनामूलक कार्यक्रम समेत सञ्चालन गरिएको गाउँपालिकाले जनाएको छ ।

कार्यक्रमलाई सम्बोधन गर्दै राप्ती गाउँपालिका अध्यक्ष प्रकाश विष्टले सङ्क्रमण फैलिन नदिन र समयमै उपचार सुनिश्चित गर्न आवश्यक सबै कदम चालिने बताउनुभयो। साथै उहाँले नागरिकलाई सचेत रहन र कुनै पनि लक्षण देखिएमा नजिकैको स्वास्थ्य संस्थामा तुरुन्त सम्पर्क गर्न आग्रह गरेका छन ।