खोज

सुर्खेत,३ भदौ ।

कर्णाली प्रदेश सरकारका मुख्यमन्त्री यामलाल कँडेलले भदौ चार गतेलाई कर्णाली बासीले सधैभरी समिझरहने दिनको रुपमा रहेको बताएका छन् ।

यही भदौ ४ गते कर्णाली प्रदेश स्थापना तथा सहिद दिवसको अवसर पारेर सुर्खेत उद्योग वाणिज्य संघद्वारा आज वीरेन्द्र नगरमा आयोजित ‘बृहत् सरसफाइ कार्यक्रम’मा उनले वातावरणीय सरसफाइले सभ्य र समुन्नत समाज निर्माणमा सहयोग पुग्ने बताए । यसमा सबै सरोकारवालाले आफ्नो अधिकारका मात्र कुरा नगरी कर्तव्य एवं दायित्व पूरा गर्नुपर्नेमा जोड दिए ।

भदौ ४ गतेको दिनलाई आजदेखि सरसफाइ, सचेतना तथा व्यवस्था ल्याउन योगदान पु¥याउने सपूतहरूको सम्मान र उनीहरूले देखेको सपना पूरा गर्ने कार्यक्रम तीन दिनसम्म उत्सवका रूपमा मनाउन प्रदेश वासीलाई आग्रह गरे ।

कार्यक्रममा उनले स्वस्थमा नवजीवनका लागि वातावरण स्वच्छ राख्नु पर्ने बताए । ‘आफ्नो घर अगाडिको आँगन सफा राख्नुस्, बाहिरबाट आउने पाहुनालाई समेत यसले खुसी बनाउँछ’मुख्यमन्त्री कँडेलले भने, ‘सरसफाइले स्वस्थ जीवन त हुन्छ नै, त्यसले सभ्य र सचेत नागरिकको पहिचान पनि दिन्छ ।’सकेसम्म फोहरलाई मोहरमा बदल्ने गरी सिर्जनशील कार्य गर्न उद्योगी एवं व्यापार व्यवसायीलाई अनुरोध गर्दै मुख्यमन्त्री कँडेलले प्रकृतिमैत्री क्रियाकलापबाट मानव स्वास्थ्य स्वस्थ र स्वच्छ राख्ने बताए ।

कार्यक्रममा सुरक्षा निकायका प्रमुख, वीरेन्द्रनगर नगरपालिकाका उपप्रमुख नीलकण्ठ खनाल, उद्योग वाणिज्य संघ सुर्खेतका अध्यक्ष हर्षविक्रम खड्का लगायत सरोकारवालाको सहभागिता थियो ।