खोज

भैरहवास्थित गौतम बुद्ध अन्तर्राष्ट्रिय विमानस्थलबाट विगत पाँच महिनादेखि अन्तर्राष्ट्रिय उडान नहुँदा सर्वत्र निराशाको अवस्था छ । अर्बौँ लगानी गरी बनेको यो विमानस्थल अन्तर्राष्ट्रिय उडानको प्रतीक्षामा छ ।

भैरहवामा अन्तर्राष्ट्रिय विमानस्थल बन्दै गर्दा जुन उत्साह थियो, त्यो अहिले निराशामा परिणत हुँदै गएको छ । यही अन्तर्राष्ट्रिय विमानस्थल चल्ने आशामा लुम्बिनी क्षेत्रमा अर्बौँ लगानी गरी ठुला ठुला होटल बनेका छन् ।

नेपाली जनताले ठुलो धनराशि खन्याएका छन् तर लगानी उठ्ने मात्रै होइन डुब्ने चिन्ता थपिएको छ । २०७९ साल जेठ ३ गते तत्कालीन प्रधानमन्त्री शेरबहादुर देउवाले बडो तामझामका साथ अन्तर्राष्ट्रिय विमानस्थल उद्घाटन गर्दै गर्दा व्यवसायीमा ठुलो आशा थियो ।

भैरहवा मात्रै होइन, समग्र लुम्बिनी क्षेत्रले अव यो क्षेत्र चलायमान बन्ने भयो भन्ने आशा एवं विश्वास गरेका थिए । तर, विडम्बना उद्घाटन भएको तीन वर्ष पूरा हुन नपाउँदै लगानीकर्ताको आशामाथि तुसारापात भएको छ । विमानस्थल पूर्ण क्षमतामा सञ्चालन हुन नपाउँदै धराशायी भएको छ ।
अन्तर्राष्ट्रिय विमानस्थल निर्माण गरेर भैरहवाकै हालतमा राख्ने हो भने मुलुकको अर्बौँ रकम बालुवामा पानी खन्याए सरह हुने बाहेक अर्को केही हुँदैन । त्यो मात्रै होइन निजी क्षेत्रको अर्बौँ लगानी जोखिममा परेको छ । मौसमलाई कारण देखाएर अन्तर्राष्ट्रिय वायुसेवा कम्पनीहरूले उडान रोकेको पाँच महिना पूरा भएको छ ।

नेपालमा तामझाम गरेर सुरु गरिएका आयोजनाहरू बिचमै बन्द भएका र रोकिएका उदाहरण धेरै छन् । त्यसमा यो विमानस्थल पनि परेको छ । अहिले भैरहवाबाट अन्तर्राष्ट्रिय उडान हुन नसक्नुमा प्राविधिक कारण भनिएको छ ।

त्यति मात्र होइन, यो विमानस्थल सञ्चालनमा अवरोध आउनुको धेरै कारणमध्ये काठमाण्डौं केन्द्रित मानसिकताले पनि काम गरेको लुम्बिनी क्षेत्रका व्यवसायीको भनाई छ । काठमाण्डौंका व्यवसायीको दवावमा भैरहवाबाट अन्तर्राष्ट्रिय उडान रोकिएको गुनासो सुन्न थालिएको छ । यो अत्यन्तै चिन्ताको कुरा हो ।

लुम्बिनी क्षेत्रका व्यवसायीले भैरहवाबाट उडान रोकिनुमा काठमाण्डौं केन्द्रित सिण्डिकेट गर्ने ठुलो गिरोहको हात रहेको बताउँदै आएका छन् । भैरहवाले यो नियती भोगिरहँदा भोलीका दिनमा पोखरामा समेत भैरहवाकै अवस्था दोहोरिने चिन्ता छ ।

भैरहवामा जेनतेन भैरहेको अन्तर्राष्ट्रिय उडान रोकिँदा पोखराको अन्तर्राष्ट्रिय विमानस्थलको विषयमा पोखरेलीहरू उत्तिकै चिन्तित छन् । निश्चितरूपमा पोखरा र गौतम बुद्ध अन्तर्राष्ट्रिय विमानस्थल सञ्चालनमा कठिनाईका केही प्राविधिक समस्या छन् ।

अन्तर्राष्ट्रिय उडानमा देखिएको अडचन, बेथिती छँदैछन् । त्यसमाथि उडान सञ्चालनको स्पष्ट कार्यविधि नबन्नु चुनौतिकै रूपमा रहेको छ । सरकारले अन्तर्राष्ट्रिय विमानस्थललाई चलाउने हो भने काठमाण्डौं केन्द्रित अन्तर्राष्ट्रिय उडान र व्यवसायीको केन्द्रिकृत सोँचमा परिवर्तन गर्नु जरुरी छ ।

अन्तर्राष्ट्रिय विमानस्थल निर्माण गर्नेमात्र होइन, चलाउने ग्यारेन्टी पनि सरकारले लिनुपर्दछ । होइन भने विमानस्थल निर्माणको लगानी बालुवामा पानी हुनेछ । यो बिषयमा सरकार सचेत बनोस् ।  मुलुकले पाएको भरपर्दाे र विश्वासयोग्य अन्तर्राष्ट्रिय उडान रोकिएकोमा पर्यटन व्यवसायीमा ठुलो निरासा छाएको छ ।

यो विमानस्थलबाट भारतसंग सिधा एयर रुट छैन । भारतले आकास उपलब्ध नगराउँदा अनिश्चयको वातावरण सिर्जना भएको यथार्थ हो । कतिपयले त उडान माफियाहरूले काठमाण्डौं बाहिरबाट अन्तर्राष्ट्रिय उडान भएको देख्नै र सुन्नै नचाहेको र उनीहरूकै कारण भैरहवाको गौतम बुद्ध अन्तर्राष्ट्रिय विमानस्थललाई जसरीपनि असफल बनाउने प्रयास भैरहेको तर्क गरिरहेका छन् ।

जेहोस भैरहवाको गौतम बुद्ध अन्तर्राष्ट्रिय विमानस्थललाई जसरीपनि सफल वनाउने विषयमा सरकार, यस क्षेत्रका पर्यटन व्यवसायी र आम जनता सवैको ध्यान जाओस् । शनिवारमात्रै नागरिक उडड्यन मन्त्री बद्री पाण्डे भैरहवा आएर व्यवसायीसंग विमानस्थल संचालनको विषयमा अन्तरक्रिया गरेका छन् ।

अव छलफल र गोष्ठी तथा बैठक गरेरमात्रै हँुदैन, विमानस्थल चलाउनेतर्फ ध्यान जानुप¥यो । खासगरी सरकारले नेतृत्वदायी भूमिका खेल्नु जरुरी छ ।