खोज

सुनवल, ३१ साउन ।

नवलपरासी जिल्लाकै सबैभन्दा धेरै भिडभाड हुने परासी हाटबजार व्यवस्थापनको ठेक्का लागेको ८ वर्ष भयो तर हालसम्म काम पुरा भएको छैन । रामग्राम–२ परासीमा रहेको हाटबजार अव्यवस्थित भएपछि २०७४ सालमा ठेक्का सम्झौता भई काम सुरु भएको थियो ।

८ करोडको लागतमा डेढ वर्षमा काम सक्ने गरी पप्पु श्री शक्ति जेभीले हाटबजार व्यवस्थापनको जिम्मा पाएकोमा अझै १६ प्रतिशत काम पुरा भएको छैन । शुक्रवार ठेकेदारले काम पुरा नगरेको विषयमा ठेकेदार कम्पनीका प्रतिनिधि र सङ्घीय सरकार अन्तर्गतको सघन सहरी तथा भवन निर्माण आयोजनाका प्रतिनिधिसँग स्थानीय तहका जनप्रतिनिधिले आक्रोश व्यक्त गरे ।

रामग्राम नगरपालिकाका प्रमुख धनपत यादवले अब काम नभए कर्मचारी र ठेकेदार दुवैलाई थुन्ने चेतावनी दिए । समयमै काम पुरा नहुँदा हाटबजार व्यवस्थापनमा समस्या भएको यादवले बताए । ‘स्थानीय सरकार सहजिकरणका लागी तयार छ, तर ठेकेदारले पटक पटक काम पुरा गर्छु भनेर काम नगर्दा अपसज हामीले खेप्नुपरेको छ, यादवले गुनासो गरे ।’

सङ्घीय र प्रदेश सरकारको कामको ढिलासुस्तीको जवाफ दिँदा नागरिकमा स्थानीय तहका जनप्रतिनिधिप्रति गलत धारणा विकास हुने खतरा रहेको यादवले औल्याए । वडा नम्बर दुईका वडा अध्यक्ष निरज रौनीयारले यसअगाडि पनि पटक–पटक काम सुरु गर्छु भनेर ठेकेदार गायब हुने गरेको भन्दै विश्वास गर्ने आधार नभएको बताए ।

स्थानीय तहका जनप्रतिनिधिको चर्को आक्रोश पछि सघन सहरी विकास तथा भवन निर्माण आयोजनाले ठेकेदारलाई एक हप्ता भित्र काम सुरु गर्ने प्रतिबद्धता गराएको छ । सघन सहरी तथा भवन निर्माण आयोजना चितवनका प्रमुख झपट बहादुर थापाले अबको १५ दिन भित्र काम सुरु नभए ठेक्का तोड्ने प्रक्रिया सुरु गर्ने जानकारी दिए ।

हाटबजारमा टहरा निर्माणको काम सके पनि ब्लक बिछ्याउने, बत्ती जोड्ने, रेलिङ निर्माण गर्ने काम बाँकी छ । ‘काम सक्न पटक पटक ताकेता गरेको हो, ठेकेदारको आन्तरिक समस्याले काम हुन सकेको थिएन, अब अन्तिम चेतावनी दिएपछि एक हप्ता भित्र काम सुरु गर्ने प्रतिबद्धता ठेकेदारले जनाएको छन्,’ थापाले भने ।