खोज

काठमाडौं ।

गुन्डा नाइकेको रूपमा परिचित चक्रे मिलन (मिलन गुरुङ) लाई जिल्ला अदालत भक्तपुरले १ लाख १० हजार रुपैयाँ धरौटीमा रिहा गर्न आदेश दिएको छ । न्यायाधीश रामप्रसाद न्यौपानेको इजलासले आज शुक्रबार चक्रेको मुद्दामा बयान सुनेर थुनछेक आदेश जारी गरेको हो ।

जिल्ला प्रहरी परिसर भक्तपुरका डीएसपी ढुण्डिराज न्यौपानेका अनुसार तोकिएको धरौटी चक्रेले बुझाइसकेका छन् र रिहाई प्रक्रिया अगाडि बढिरहेको छ ।

चक्रेविरुद्ध ज्यान मार्ने उद्योगको कसुरमा मुद्दा दर्ता भएको छ। उक्त मुद्दा एक वर्षअघि बिहीबार दर्ता भएको हो, जसमा चक्रेको भतिज मनिष रायमाझीलाई सानोठिमीस्थित बड्डाको तावा रेस्टुरेन्टमा आक्रमण गरेको आरोप लागेको छ । मनिषका काका दिनेशकुमार रायमाझीले उजुरी दिएका थिए ।

यो घटनामा सर्लाहीको हरिवन नगरपालिका–४ का २५ वर्षीय अजित खवाससहितका अन्य व्यक्तिहरूले पनि आक्रमण गरेको उजुरीमा उल्लेख छ । त्यसक्रममा रायमाझी दुवै कोखमा खुकुरी प्रहार गरी घाइते भएका थिए ।

चक्रे बुधबार मात्रै अभद्र व्यवहारको आरोपमा जिल्ला प्रहरी परिसरको हिरासतबाट ३० हजार धरौटी बुझाएर रिहा भएका थिए । न्यायाधीश खिमानन्द भुसालको आदेश अनुसार उनलाई धरौटीमा रिहा गरिएको थियो ।

यसअघि १५ साउनमा उपत्यका अपराध अनुसन्धान कार्यालय र जिल्ला प्रहरी परिसर काठमाडौंको संयुक्त अपरेशनमा चक्रेसहित ४७ जना पक्राउ परेका थिए । तीमध्ये २८ जनालाई छाडिएको थियो ।

महाराजगञ्जस्थित होटल साम्बालामा चक्रेको जन्मदिन पार्टी मनाइरहेको बेला मध्यराति प्रहरीले उनीहरूलाई पक्राउ गरेको थियो ।  उक्त पार्टीमा होहल्ला भएको थियो ।