जिन्दगीलाई प्रिय जिन्दगी बनाउनका लागि विभिन्न पक्षमा ध्यान दिनुपर्छ । यो केवल भौतिक सुख सुविधामा मात्र सीमित नभई जीवन शैली, मानसिक शान्ति र व्यक्तिगत सन्तुष्टिमा पनि निर्भर गर्दछ । जीवनलाई सहज र सरल बनाउनका लागि केही आधारभूत सूत्रहरू अपनाउन सकिन्छ। यसमा धेरै महत्त्वाकाङ्क्षी नबन्ने, अनावश्यक खर्च नगर्ने, तडकभडकबाट बच्ने र खराब बानीहरू त्याग्ने जस्ता कुराहरू पर्दछन् ।
आफ्नो जीवन शैलीमा क्रमिक परिवर्तन ल्याउनु महत्त्वपूर्ण हुन्छ । कुनै पनि कुराको नतिजा तुरुन्तै प्राप्त हुँदैन, त्यसैले धैर्यता आवश्यक पर्छ । आफ्नो जीवन शैली बदल्न समय लाग्छ र यो क्रमिक प्रक्रिया हो । यसको सुरुवात डायरी लेखनबाट गर्न सकिन्छ, जहाँ के कुरा बदल्नु पर्नेछ, के त्याग्नु पर्नेछ र के आर्जन गर्नु पर्नेछ भन्ने कुरा लेख्न सकिन्छ। यसरी प्राथमिकता निर्धारण गरी आफूलाई परिवर्तन गर्न सकिन्छ ।
अनावश्यक कुराहरूबाट छुटकारा पाउनु पनि जीवनलाई सरल बनाउने एउटा तरिका हो । जीवनमा खासै जरुरी नहुने अनावश्यक काम, लुगाफाटो, किनमेल, गफ गाफ, अरूको चियोचर्चा र चासोबाट आफूलाई टाढा राख्नुपर्छ । घरका भौतिक चिजबिज होस् वा आनीबानी, जुन कुरा काम लाग्दैन, त्यसलाई हटाउनुपर्छ ।
आफूसँग भएका कुराहरूको अधिकतम प्रयोग गर्नु बुद्धिमानी हुन्छ । कुनै पनि कुरालाई त्यत्तिकै नछोडी अन्तिम अवस्था सम्म त्यसको सदुपयोग गर्नुपर्छ । उदाहरणका लागि, फाटेका लुगा सिलाएर लगाउन सकिन्छ वा फुटेका भाँडावर्तनलाई गमला वा अन्य वस्तुको रूपमा प्रयोग गर्न सकिन्छ ।
बजारमा सामानहरू किनमेल गर्दा पनि सोच विचार पुर्याउनु आवश्यक छ । हामीले जीवनमा धेरै यस्ता कुराहरू खरिद गर्छौँ, जसले खास फाइदा गर्दैन वा हाम्रो जीवनमा खासै प्रयोगमा आउँदैनन् । अनावश्यक कुराहरू खरिद गर्नुको सट्टा आवश्यक र महत्त्वपूर्ण कुराहरू मात्र खरिद गर्नुपर्छ । जति धेरै खर्च घट्छ, त्यति नै जीवन सहज हुन्छ ।
व्यवस्थित रहनु पनि प्रिय जिन्दगी को लागि अपरिहार्य छ । प्रायः हामी हतारमा हुन्छौँ र हाम्रो दैनिकी अस्तव्यस्त हुन्छ । आफ्नो जीवनका लागि कुशल व्यवस्थापक बन्नु जरुरी छ । लुगाफाटो, सरसामानदेखि समय सम्मको उचित व्यवस्थापन गर्नुपर्छ । आफूलाई जरुरी कुराहरू सुरक्षित राख्ने र जरुरी कामहरू समयमै सम्पन्न गर्ने जस्ता कार्यले हामीलाई व्यवस्थित बनाउँछ ।
प्रिय जिन्दगी को अर्को महत्त्वपूर्ण अवधारणा भनेको आत्म(प्रेम हो, जसलाई ुसेल्फ(लभु पनि भनिन्छ, जसले व्यक्तिलाई आफ्नो जीवनमा सन्तुलन, आत्मविश्वास, र खुशी प्राप्त गर्न मद्दत गर्छ । यो अरूलाई प्रेम गर्नु जत्तिकै महत्त्वपूर्ण छ, तर प्रायः यसलाई बेवास्ता गरिन्छ वा यसलाई स्वार्थी मानिन्छ।
वास्तवमा, आत्म(प्रेमले व्यक्तिलाई अरूसँगको सम्बन्धमा पनि सकारात्मक प्रभाव पार्छ र जीवनलाई सही दिशामा लैजान्छ । आफ्ना उपलब्धिहरू साथीभाईहरूसँग बाँडेर वा आफैँलाई श्रेय दिएर खुशी मनाउनुपर्छ । आत्म(प्रेमको एक तरिका आफैँमा विश्वास गर्नु हो । आफ्नो मान्यतामा दृढ रहनुपर्छ र आफूलाई राम्रो लाग्ने काम गर्नुपर्छ । आत्मविश्वासले अरूलाई पनि आफूमाथि विश्वास गर्न प्रेरित गर्छ । आफ्नो ख्याल राख्नु आत्म(प्रेमको आधारभूत पक्ष हो ।यसले आफूले चाहे जसरी जीवन जिउने कला सिकाउँछ ।
समग्रमा, सबैलाई प्रेम गर, थोरैलाई विश्वास गर र कसैलाई पनि हानी नगर , भन्ने भनाइलाई आत्मसाथ गर्दै भौतिकवादी सोचबाट माथि उठेर मानसिक शान्ति, सन्तुष्टि र व्यवस्थित जीवनशैलीमा ध्यान दिँदा जीवनलाई प्रिय जिन्दगी बनाउन सकिन्छ ।
२७ मंसिर २०८२, शनिबार
