खोज

सुर्खेत,२८ साउन ।

कर्णालीका विपन्न बिरामीलाई यातायात खर्च उपलब्ध गराइने भएको छ । प्रदेशको सामाजिक विकास मन्त्रालयले अब देखि बेवारिसे, असहाय तथा विपन्न बिरामीहरूलाई यातायात खर्च उपलब्ध गराउने जनाएको छ ।

आर्थिक अभावले अस्पतालको यात्रा तय गर्न नसक्ने वा उपचारपछि घर फर्कने पैसा नभएर अलपत्र पर्ने बिरामीको समस्यालाई मध्यनजर गर्दै कर्णाली सरकारले यस्तो कार्यक्रम ल्याएको हो ।

यसका लागि सम्बन्धित वडाको सिफारिस वा उपचार गरिएको अस्पतालले बेवारिसे, असहाय, विपन्न, यातायात खर्चको अभावले अस्पताल पुग्नवा अस्पतालबाट घर जान नसक्ने बिरामी सिफारिस गरेको हुनुपर्ने छ । यस्तो सिफारिससहित मन्त्रालयमा निवेदन गरेपछि यातायात खर्च उपलब्ध गराइने छ ।

भौगोलिक दुरीको आधारमा ५ हजारदेखि २० हजार रुपैयाँसम्म यातायात खर्च उपलब्ध गराइने सामाजिक विकासमन्त्री घनश्याम भण्डारीले जानकारी दिए । सामाजिक विकास मन्त्रालयले आर्थिक वर्ष २०८२/०८३ का लागि यो शीर्षकमा २५ लाख रुपैंयाँ बजेटको व्यवस्थापन गरेको छ ।

यस्तै, उपचारका क्रममा मृत्यु भई आर्थिक अभावमा धार्मिक संस्कार गर्न नसक्ने नागरिकका लागि शववाहनवापतको रकम पनि भुक्तानी दिने व्यवस्था गरिएको मन्त्री भण्डारीले जानकारी दिए ।

भुक्तानीका लागि मन्त्रालयका सचिवको नेतृत्वमा एक समिति गठन गरिएको छ । सदस्यहरूमा स्वास्थ्य महाशाखा प्रमुख, आर्थिक प्रशासन शाखा प्रमुख, चिकित्सा शाखा प्रमुख रहेका छन् ।