खोज

नवलपरासी (पश्चिम) ।

बर्दघाट नगरपालिका–२, चिसापानीस्थित दिव्य ज्योति बहुमुखी क्याम्पसमा विभिन्न विद्यार्थी संगठनहरूको संयुक्त सङ्घर्ष समितिले तालाबन्दी गरेका छन्।

विद्यार्थी शुल्क वृद्धि, कर्मचारीको महङ्गी भत्ता तथा पारिश्रमिक बढाउने निर्णयप्रति असन्तुष्टि जनाउँदै तालाबन्दी गरिएको हो।

क्याम्पस सञ्चालक समितिको २०८२ साउन २६ गते बसेको बैठकका निर्णयहरूप्रति आपत्ति जनाउँदै विद्यार्थी संगठनहरूले १०+२ र स्नातक तहको शुल्क वृद्धि, भ्रमण शुल्क, तथा प्राध्यापक–कर्मचारीको पारिश्रमिक र महङ्गी भत्ता वृद्धि गर्ने निर्णय खारेज गर्न माग गरेका छन्।

संयुक्त विज्ञप्ति अनुसार, शुल्क वृद्धि आर्थिक रूपमा कमजोर विद्यार्थीहरूका लागि शिक्षा पहुँचमा अवरोध हुने, शिक्षा क्षेत्रको मूल भावनाविपरीत हुने र थप आर्थिक भार सिर्जना गर्ने बताइएको छ।

विद्यार्थीहरूले तीन दिनभित्र निर्णय सच्याउन माग गर्दै अन्यथा कडा आन्दोलनमा उत्रिने चेतावनी दिएका छन्।

तालाबन्दीसम्बन्धी संयुक्त विज्ञप्तामा स्वतन्त्र विद्यार्थी युनियनका अध्यक्ष शशी बि.क., अनेरास्ववियुका अध्यक्ष प्रशान्त सुवेदी, नेविसंघका सभापति प्रशान्त गिरी, अखिल (क्रान्तिकारी बहुमत) का सचिव बिमला गीरी, र अनेरास्ववियु (क्रान्तिकारी) का सचिव शिशिर पौडेलको हस्ताक्षर छन्।

यस विषयमा छलफलका लागि क्याम्पस प्रशासन र विद्यार्थी प्रतिनिधिबीच भोलि बिहान ८ बजे बैठक तय भएको अध्यक्ष शशी बि.क.ले जानकारी दिएका छन्।