नेपालगञ्ज , २८ साउन ।
महिला उद्यमी महासंघ नेपालले तीनै तहमा आफ्नो संरचना विस्तार अभियानलाई तीव्र पारेको छ। महिला उद्यमीको क्षमता अभिवृद्धि र नेतृत्व विकासलाई थप सुदृढ बनाउन संघियताको मर्मानुसार संरचना विस्तार गर्न लागेको हो ।
यसै अभियानअन्तर्गत महासंघले बुधबार लुम्बिनी प्रदेश र कोहलपुर नगर समितिको गठन गर्दै नयाँ नेतृत्वको जिम्मेवारी सुम्पेको छ। लुम्बिनी प्रदेश समितिको अध्यक्षमा बाँकेकी महिला उद्यमी सरस्वती शर्मा पराजुली चयन भएकीछिन् ।
उनको अध्यक्षतामा ९ सदस्यीय तदर्थ समिति गठन गरिएको हो । उपाध्यक्षमा पाल्पाकी सुनिता चन्द राना, सचिवमा रुपन्देहीकी अनिता खड्का, कोषाध्यक्षमा बाँकेकी अन्जु गुरुङ रहेका छन् । त्यस्तै सदस्यमा दाङकी यशोदा पाण्डे, कपिलवस्तुकी कल्पना कुँवर, बर्दियाकी उमा पन्त क्षेत्री, रोल्पाकी हिरा घले गुरुङ र गुल्मीकी निर्मला खत्री चयन भएका छन् ।
महासंघले यसअघि नै कोसी र कर्णाली प्रदेशमा समिति गठन गरिसकेको छ भने अब बाँकी प्रदेशहरूमा पनि क्रमशः संरचना विस्तार गर्ने तयारी भइरहेको जनाएको छ । नेपालगञ्जमा आयोजित विशेष समारोहमा लुम्बिनी प्रदेशसँगै कोहलपुर नगर समितिको पनि विस्तार गरिएको हो ।
कोहलपुर नगर समितिमा शारदा शर्मा, शान्ति गैरे, कल्पना शर्मा, राधा गौतम, शारदा थापा खतिवडा, रिता चन्द योगी, गिता बिक, दुर्गा बस्नेत, ओकि आलेमगर र सुष्मा घर्तिमगर सदस्यका रूपमा रहेका छन् । तदर्थ समितिमा चाँडै पदीय जिम्मेवारीको बाँडफाँड गरिने बताइएको छ । कार्यक्रममा नवनिर्वाचित पदाधिकारीलाई शपथ ग्रहण गराउँदै महासंघकी केन्द्रीय अध्यक्ष शोभा ज्ञवालीले, संगठनलाई स्थानीय तहदेखि केन्द्रसम्म बलियो र सक्षम रूपमा पु¥याउने लक्ष्यसहित अभियान अघि बढाएको बताईन् ।
“हामीले प्रदेशस्तरमा गठन सुरु गरिसकेका छौँ,” अध्यक्ष ज्ञवालीले भनिन्, “अब स्थानीय, प्रदेश हुँदै केन्द्रीय तहसम्म महिला उद्यमीको सशक्त संगठन बनाउन हाम्रो यात्रा जारी रहनेछ।” २३ वर्षको इतिहास बोकेको महिला उद्यमी महासंघ नेपाल, मुलुकभर महिला उद्यमीको पहिचान, अवसर र नेतृत्व क्षमतालाई अझ उचाइमा पुर्याउने संकल्पका साथ यो अभियानमा जुटेको संघले जनाएको छ ।
कोहलपुर निवासी महिला उद्यमी अञ्जना पाण्डेको अध्यक्षतामा भएको विशेष समारोहमा नेपालगञ्ज उपमहानगरपालिकाका नगर प्रमुख प्रशान्त विष्ट लगायतका बाँकेका विभिन्न उद्योगी ब्यवसायीहरुको उपस्थित रहेको थियो ।
१९ मंसिर २०८२, शुक्रबार
