खोज

काठमाडौं ।

अभद्र व्यवहारको मुद्दामा ३० हजार रुपैयाँ धरौटीमा रिहा गर्न काठमाडौं जिल्ला अदालतले आदेश दिए पनि मिलन गुरुङ उर्फ चक्रे मिलन तत्काल छुट्ने सम्भावना देखिदैन  । न्यायाधीश खिमानन्द भुसालको इजलासबाट बुधबार धरौटीमा रिहा हुने आदेश भए पनि अर्को आपराधिक मुद्दाका कारण उनलाई भक्तपुर लैजाने तयारी गरिएको छ ।

चक्रे मिलनसँगै धरौटी माग गरिएका अन्य १८ जना भने आजै धरौटी बुझाएर रिहा भएका छन्। तर, चक्रेमाथि भक्तपुरमा ज्यान मार्ने उद्योगअन्तर्गत मुद्दा दर्ता भएकाले उनी छुट्न नपाउने जिल्ला प्रहरी परिसर काठमाडौंका एसपी कुलदीप चन्दले जनाएका छन् ।

भक्तपुर जिल्ला प्रहरी परिसरका प्रवक्ता डीएसपी ढुण्डिराज नेउपानेले पनि चक्रेमाथि सानाेठिमीस्थित एक रेष्टुरेन्टमा भएको आक्रमणको घटनासँग जोडिएको मुद्दा रहेकाले उनलाई भक्तपुर ल्याइने बताएका छन् ।

जाहेरी अनुसार, १० भदौ २०८१ मा दिव्यशजरीस्थित बड्डाको तावा रेष्टुरेन्टमा चक्रे समूहले मनिष रायमाझीमाथि खुकुरी प्रहार गरी गम्भीर घाइते बनाएको आरोप छ । सो घटनामा मुख्य प्रतिवादी अजित खवासलाई पहिल्यै पक्राउ गरिए पनि चक्रेको नाम ‘वतन नखुलेको’ भन्दै प्रतिवादीमा समावेश गरिएको थिएन ।

हाल चक्रेमाथि सोही मुद्दामा अनुसन्धान अगाडि बढाउने तयारीमा प्रहरीले भक्तपुर लैजान लागेको हो ।

चक्रे मिलन १५ साउनमा महाराजगञ्जको होटल साम्बालामा जन्मदिनको पार्टीको क्रममा होहल्ला गरेको आरोपमा पक्राउ परेका थिए । उपत्यका अपराध अनुसन्धान कार्यालय र काठमाडौं प्रहरी परिसरको संयुक्त अपरेसनमा ४७ जनालाई पक्राउ गरिएको थियो, जसमा २८ जनालाई पछि रिहा गरिएको थियो ।