खोज

सुर्खेत, २७ साउन । 

फिरन्ते जीवन बिताउँदै आएका राउटे समुदायको संरक्षणको लागि राउटे कोरिडोर निर्माण गरिने भएको छ । कर्णाली सरकारले चालु आर्थिक वर्ष २०८२/२०८३ मा राउटे कोरिडोर निर्माण गर्न लागिएको जनाएको छ । राउटे समुदायको बसाई र उनीहरूको अवस्थालाई मध्यनजर गर्दै उक्त अवधारणा ल्याइएको हो ।

राउटे समुदायको कष्टकर जीवनशैली र मदिरा सेवनले उनीहरूको जनसङ्ख्या घट्दो क्रममा रहेको छ । पछिल्लो समय उनीहरू उनीहरूको विभिन्न रोगको सङ्क्रमण देखिन थालेको छ । यही असुरक्षित अवस्थालाई मध्यनजर गर्दै उनीहरूको संरक्षणको लागि यस्तो अवधारणा अघि सारिएको छ ।

कर्णाली प्रदेशको राउटे नीति, राउटे समन्वय समितिको अध्ययन प्रतिवेदन, विभिन्न संवैधानिक आयोगको सिफारिस तथा राउटेको विगत १० वर्षको बसोबास स्थलको नक्सांकनका आधारमा कोरिडोर बनाउन लागिएको हो । प्रदेश सरकारका सामाजिक विकास मन्त्री घनश्याम भण्डारीले सार्वजनिक गरेको एक वर्षे कार्य प्रगतिमा उक्त कुरा उल्लेख छ ।

राउटेको संरक्षण, संवर्द्धन र प्रवर्द्धन गर्न चालु आर्थिक वर्षमा राउटे कोरिडोर स्थापना गर्न लागिएको मन्त्री भण्डारीले जानकारी दिए ।  विशेष गरेर राउटे समुदायहरू कर्णाली प्रदेशका दैलेख, सुर्खेत, सल्यान लगायतका जिल्लाका वन क्षेत्रमा अस्थायी टहरा बनाएर राउटे बसोबास गर्छन् ।

राउटे बसाइँ सर्ने क्षेत्र समेटेर बनाइने कोरिडोर अवधारणामा राउटे समन्वय समितिको निर्णयका आधारमा प्रोफाइल प्रकाशन गर्ने, विकास साझेदारको समन्वयमा पोषणयुक्त खाद्य सामग्री प्रदान गर्ने, राउटेका लागि प्रादेशिक तथा अन्य सरकारी अस्पतालमा निःशुल्क उपचारको व्यवस्था मिलाइने छ ।

यस्तै राउटे समुदायका बालबालिकालाई शिक्षाको अवसरतर्फ अग्रसर गराउन आवश्यक सामग्री विकास गरी वितरण गर्नेदेखि आवश्यक क्षमता विकासका कार्यक्रम राउटे कोरिडोर मार्फत गरिनेछ । कोरिडोर मार्फत राउटे समुदायको संरक्षण गर्न समयानुकूल कानुनी प्रबन्ध समेत गरिनेछ । गएको वर्ष राउटे समुदायलाई आवश्यक लत्ताकपडा, त्रिपाल, खाद्यान्न सामग्री लगायतका सहायता उपलब्ध गराइएको सामाजिक विकास मन्त्रालयले जनाएको छ ।