खोज

गुल्मी, २७ साउन । 

गुल्मीको मुसिकोट नगरपालिकाले एक घर एक धारा कार्यक्रमलाई तीव्रता दिँदै आएको छ । नागरिकको मुख्य आधारभूत आवश्यकताको रूपमा रहेको खानेपानीको स्थायी समाधानका लागि ‘एक घर एक धारा’ कार्यक्रमलाई प्राथमिकताका साथ कार्यान्वयन गर्दै आएको नगरपालिकाले जनाएको छ ।

नगरपालिका भित्र हालसम्म ८५ प्रतिशत घरधुरीमा खानेपानीको धारा जडान गरी एको मुसिकोट नगरपालिकाका प्रमुख जीवलाल खरेलले बताएका छन् । खानेपानीको अभावका कारण दैनिक जीवनयापनमा कठिनाइ भोग्दै आएका स्थानीय वासीहरूका लागि यो कार्यक्रमले ठुलो राहत पुगेको छ ।

भौगोलिक विकटता अग्लो र विकट बस्तीहरूलाई मध्यनजर गर्दै कतिपय स्थानमा लिफ्ट प्रविधिबाट खानेपानी आपूर्ति गरिएको छ । यसले त्यस क्षेत्रका बासिन्दालाई सहज रूपमा सुरक्षित र स्वच्छ पानी उपभोग गर्न सहयोग पु¥याएको छ ।

खानेपानीको लागि दिनभर पँधेरो र कुवा पुग्नुपर्ने नागरिकहरू यति बेला खाना पकाउने ठाउँमै खानेपानी पुगेको मुसिकोट नगरपालिका –१ की भूमि थापाले बताए ।

अहिले खान पानीले धेरै परिवर्तन गरेको उनको भनाइ छ । यसले गृहिणीहरूका लागि समयको बचतसँगै थप सहजता पुगेको छ ।नगरपालिकाले आर्थिक वर्ष २०८१/०८२ मा नगर भित्र २२ वटा साना तथा ठुला खानेपानी योजनाहरू कार्यान्वयनमा ल्याएको छ । ती योजनाहरू अन्तर्गत ३३० घरधुरीमा नयाँ धारा जडान गरिएको नगरपालिकाले जनाएको छ ।

कार्यक्रमको प्रभावकारिताका कारण धेरैजसो बस्तीमा अहिले घर–घरमै खाने पानीको धारा पुगिसकेको मुसिकोट नगरपालिकाका प्रमुख प्रशासकीय अधिकृत चेतनाथ गिरीले बताएका छन् । यो उपलब्धि नगरपालिकाको ‘एक घर एक धारा’ कार्यक्रमलाई साकार बनाउने दिशामा अगाडि बढेको गिरीले बताए ।

केही वर्ष अघिसम्म कुवा र पँधेरोको भर पर्न बाध्य बनेका नागरिकहरू अहिले घरमै धारा आएपछि खुसी बनेका छन् । नगर प्रमुख जिवलाल खरेलका अनुसार खानेपानी पहुँचलाई बिस्तार गर्नु नगरपालिकाको मुख्य योजना रहेको बताए ।

नागरिकको दैनिक जीवनसँग गाँसिएको यो महत्त्वपूर्ण विषयमा दीर्घकालीन समाधान दिन चाहेको भन्दै उनले आगामी आर्थिक वर्षमा शतप्रतिशत घर धुरीमा खानेपानी पुर्‍याउने बताएका छन् ।

“मुसिकोटका धेरै ठाउँहरूमा बिहान–बेलुका टाढाबाट गाग्री बोकेर पानी ल्याउनु पर्थ्यो, अब भने घरमै धारा जडान भएपछि ठुलो राहत मिलेको छ,” स्थानीय मिलन थापाले बताए । मुसिकोट नगरपालिकाको –४ दजाकोटमा यसअघि दूषित पानीकै कारण झाडापखालाबाट एक जनाको मृत्यु भएको थियो । अहिले त्यस स्थानमा पनि स्वच्छ पिउने पानी पुगिसकेको छ ।

स्वच्छ खानेपानी पुगेका स्थानमा विशेष गरी बालबालिका, गर्भवती महिला, वृद्ध वृद्धाहरूको स्वास्थ्यमा प्रत्यक्ष सकारात्मक प्रभाव परेको बताइएको छ । नगरपालिकाले हालसम्म सम्पन्न योजनाहरूको अध्ययन र मूल्याङ्कन गरी बाँकी रहेका १५ प्रतिशत घरधुरीमा पनि छिट्टै धारा जडान गर्ने लक्ष्य लिएको प्रमुख प्रशासकीय अधिकृत गिरीले जानकारी दिए ।

नगरपालिकाले खानेपानी सँगै सरसफाइ, जलस्रोत संरक्षण र स्रोत व्यवस्थापनमा पनि दीर्घकालीन नीति र योजना अघि सारेको छ । यसले नगरवासीको जीवनस्तर सुधारसँगै वातावरणमैत्री विकासतर्फ थप टेवा पुग्ने अपेक्षा नगरले गरेको छ ।