काठमाडौँ ।
राज्य व्यवस्था तथा सुशासन समितिका सभापति रामहरि खतिवडा ‘कुलिङ अफ पिरियड’ सम्बन्धी गडबडी प्रकरणमा छानबिन विशेष समितिले स्पष्ट रूपमा जिम्मेवार ठहर गरेपछि राजीनामाको तयारीमा देखिएका छन् ।
प्रतिनिधिसभाको मंगलबारको बैठकमा बोल्ने तयारीसहित खतिवडाले सभामुख देवराज घिमिरेसँग समय मागेका छन् । बैठक शुरू हुनुअघि उनले सभामुख घिमिरे र कांग्रेसका प्रमुख सचेतक श्याम घिमिरेसँग भेटघाट गरेका थिए । स्रोतका अनुसार, उनी सार्वजनिक रूपमा आफ्नो भूमिकाबारे स्पष्ट पार्दै पदबाट अलग हुने तयारीमा छन् ।
छानबिन विशेष समितिको प्रतिवेदनमा खतिवडाले आफ्नो ‘समन्वयकारी भूमिका’ पूरा नगरेको ठहर गरिएको छ । प्रतिवेदनअनुसार, मस्यौदा प्रतिवेदन समितिका सबै सदस्यहरूलाई देखाएर छलफल गरिनुपर्नेमा केही निश्चित व्यक्तिहरूसँग मात्र अनौपचारिक बैठक गरी प्रतिवेदन संसद्मा पेस गरिएको पाइएको छ ।
अझै गम्भीर कुरा, खतिवडाको हस्ताक्षरमार्फत प्रतिवेदन पेस भएको देखिँदा कानुनी रूपमा उनले ‘गम्भीर त्रुटि’ भएको मस्यौदाप्रति जिम्मेवारी वहन नगरेको भन्दै उनी प्रत्यक्ष रूपमा दोषी देखिएको उल्लेख छ ।
साथै, समितिका सचिव सुरजकुमार दुरा पनि जिम्मेवारी पूरा नगरेको आरोपमा प्रतिवेदनले किटान गरेको छ । उपसमिति र समितिको बैठकहरूमा सहभागी रही प्रतिवेदन लेखनमा भूमिका निर्वाह गरे पनि उनले आफ्नो सचिवीय जिम्मेवारी इमान्दारीपूर्वक नपु¥याएको ठहर गरिएको छ ।
प्रतिवेदनले मुख्यसचिव र अन्य कर्मचारीहरूको हकमा समेत ‘कुलिङ अफ पिरियड’ हटाउने विषयमा समुह बनाई सार्वजनिक रूपमा लबिइङ गरेको, र यसरी देखिएको आचरण पदीय मर्यादा विपरीत भएको उल्लेख गरेको छ ।
राजनीतिक वृत्तमा खतिवडाको सम्भावित राजीनामाले ‘कुलिङ अफ पिरियड’ प्रकरण नयाँ मोडमा जाने संकेत देखिएको छ। यसले न केवल समितिको आन्तरिक संयन्त्रमा प्रश्न उठाएको छ, तर संसदीय जिम्मेवारी र नैतिकताको विषयमा पनि बहस चर्काउने सम्भावना देखिन्छ ।
