खोज

फिफा महिला वरियतामा नेपालले ऐतिहासिक सफलता प्राप्त गरेको छ । विश्व फुटबलको सर्वोच्च निकाय फिफाले सार्वजनिक गरेको नयाँ वरियतामा नेपाल १३ स्थान माथि उक्लँदै ८७ औँ स्थानमा पुगेको छ ।

यो नेपाली महिला टोलीले हासिल गरेको अहिलेसम्मकै उच्च वरियता हो । यसअघि नेपाल ९१ औँ स्थानसम्म पुगेको रेकर्ड थियो । यसअघि १०० औँ वरियतामा रहेको नेपाल यसअघिको अङ्कबाट ४६ दशमलव ४९ अङ्क बढेर नयाँ वरियतामा ८७ औँ स्थानमा पुगेको हो ।

महिला खेलाडीले समेत इतिहास कायम गर्न सक्छन् भन्ने कुरा यो प्रमाण हो । यसअघि गत वर्ष पहिलो पटक नेपालले भारतलाई महिला भलिबलमा हराएर ऐतिहासिक जीत हात पारेको थियो ।

यसका लागि नेपाली महिला टिम बधाईको पात्र बनेको छ । नेपाली महिला खेलाडी पनि अव विश्व स्तरका खेलमा अगाडी आउन सक्छन् र नेपालको नाम राख्न सक्छन् भन्ने नेपालको वरियताले पुष्टि गरेको छ ।

यद्यपि आइतबार भएको एएफसी यू–२० महिला एसियन कपमा छनोट हुन नेपाल असफल भएको छ । समूह ‘ए’ को आफ्नो अन्तिम खेलमा उत्तर कोरियासँग ११–० गोलको फराकिलो हारसँगै छनोटबाट बाहिरिएको छ ।

यसले खेलमा जीतसंगै हारपनि स्वाभाविक हुन्छ र महिला खेलाडीहरूलाई अझै मेहनत गर्न बल प्रदान गर्ने विश्वास गरिएको छ । जेहोस नेपाली महिला खेलाडीहरूले फुटवल र भलिवलमा इतिहास रच्दै आएका छन् ।

यो नेपालका लागि गौरवको कुरा हो । नेपाली महिला खेलाडीले अन्तर्राष्ट्रिय खेल जगतमा नेपालको नाम राख्न सफल हुनु नेपालको लागि अत्यन्त महत्वपूर्ण कुरा हो । नेपाल सरकारले समेत नेपाली महिला टिमलाई बधाई दिएको छ ।

अव बधाईले मात्र पुग्दैन, नेपाली महिला खेलाडीले सघन जित हात पार्नु जरूरी छ । अझैपनि भारत नेपालभन्दा धेरै अघि छ । अव नेपालले भारतलाई फुटवलमा पराजित गर्न सक्यो भने नेपाली महिला टिम अझै सशक्त र दक्षिण एसियामा चम्किलो तारा बन्नेछ ।

आगामी दिनमा पनि सरकारले नेपाली महिला खेलाडीको उत्साह बढाउँदै खेलकै माध्यमबाट उनीहरूलाई आत्मनिर्भर बनाउनेतर्फ प्रयास गर्नु जरुरी छ । सरकारले महिला खेलाडीलाई थोरै मात्रै प्रोत्साहन गरेको अवस्थामा उनीहरू विश्व खेल क्षेत्रमा थप सिँढी उक्लिन सक्छन् भन्ने विश्व बरियताको पछिल्लो अवस्थाले प्रमाणित गरिसकेको छ ।

त्यसो त खेलकै माध्यमबाट जीवन निर्वाह गर्न ठूलो चुनौति छ । राष्ट्रिय खेलकुद परिषदले दिएको थोरै तलब र भत्ताले अहिलेको महंगी थेग्न सक्दैन । तसर्थ महिला खेलाडीलाई अव हौसला र प्रोत्साहनको खाँचो छ ।

पछिल्लो बरियताले नेपाली महिला खेलाडीले अवसर पाए अझै राम्रो गर्न सक्छन् भन्ने प्रमाणित भएको छ । यसअघि भएका प्रतियोगितामा पनि विषम परिस्थिति हुँदाहुँदै पनि नेपाली महिला खेलाडीले राम्रो प्रदर्शन गर्दै आएका छन् । चाहे त्यो फुटवलको कुरा होस या अरू खेल क्षेत्रको ।

जसरी नेपाली महिला क्रिकेट आज सफलताको बिन्दुमा उक्लिएको छ, त्यसैगरी भलिबल र फुटवलको क्षेत्रबाट पनि महिला खेलाडी अघि बढ्न सक्छन् । अव उनीहरूलाई प्रेरणा र प्रोत्साहनको आवश्यकता छ । अवको दिनमा खेल क्षेत्रको अगाडिको यात्रा अझ चुनौतीपूर्ण छ ।

सरकारले पनि महिला खेलाडीलाई प्रोत्साहन दिनैपर्दछ । अहिलेको सरकारका प्रधानमन्त्री केपी शर्मा ओली खेलका प्रशंसक हुनुहुन्छ । तसर्थ प्रधानमन्त्रीबाटै महिला खेलाडीले प्रोत्साहन पाउँछन भन्ने आशा एवं विश्वास गर्नु अन्यथा होइन ।

खेलाडीले हासिल गर्ने सफलतामा गौरव गर्न सम्बद्घ निकायले त्यस्तो वातावरण बनाउन सक्नुपर्छ । सरकारले बढाउने मनोबलले नै नेपालको खेल क्षेत्रको विकास संभव छ । अतः सरकारको होस्टेमा खेलाडीले हैसे गरेर नेपालको खेल क्षेत्रको विकासमा ऐक्यबद्धता प्रकट गर्न अव ढिलाई नगरौं ।