खोज

 काठमाडौं, २६ साउन ।

नेपाली सेयर बजारमा सोमबार केही उत्साहजनक संकेत देखिए पनि त्यसले लामो समय टिक्न सकेन । कारोबारको सुरुवातमा नेप्से सूचक हरियालीतर्फ उन्मुख भए पनि त्यसले गति कायम राख्न सकेन । ११:३२ बजेसम्म बजारले २८७५ अंक छुँदै दिनको उच्च बिन्दु बनायो, तर त्यसपछि बजारले पछिल्लो केही समययता देखाउँदै आएको अस्थिरता दोहोर्‍यायो । अन्ततः नेप्से २७.९० अंक घट्दै २८२२ अंकमा थामियो ।

बजार घटे पनि कारोबार रकममा भने उल्लेखनीय वृद्धि देखियो । अघिल्लो दिनको तुलनामा आजको कारोबार करिब दुई अर्बले बढ्दै १० अर्ब २१ करोड रुपैयाँमा पुग्यो। यो गिरावटका बीच पनि लगानीकर्ताको सक्रियता कायमै रहेको संकेत मान्न सकिन्छ ।

लगानीकर्ताले सेयर बजारमा विभिन्न समूहमा बेचबिखनलाई तीव्र बनाएका छन् । अधिकांश समूहमा गिरावट आएको छ भने केही कम्पनीहरूले आंशिक उचाइ हासिल गरेका छन् । माइक्रोफाइनान्स र विकास बैंक समूहमा सबैभन्दा ठूलो गिरावट देखिएको छ । हाइड्रोपावर, बीमा, फाइनान्स, उत्पादन र व्यापार समूहहरूमा समेत कमजोर प्रदर्शन देखिएको हो ।

आजको दिनमा रिभर फल्स पावरले उच्चतम १० प्रतिशत मूल्यवृद्धि गर्दै सकारात्मक संकेत दिएको छ । त्यस्तै पञ्चकन्या माइ हाइड्रोपावर र बुद्धभूमि हाइड्रोपावरले पनि लगानीकर्ताको ध्यान खिच्न सके । यस विपरीत, उन्नति सहकार्य लघुवित्त, लिबर्टी इनर्जी र ट्रेड टावर जस्ता कम्पनीहरूको सेयर मूल्यमा तीव्र गिरावट देखिएको छ, जसले बजारमा जोखिमको संकेत दिएको छ ।

धेरै कारोबार भएका कम्पनीहरूको सूचिमा शिवम् सिमेन्ट, हिमालयन रिइन्स्योरेन्स, नेपाल पुनर्बीमा, साहस ऊर्जा र बुटवल पावर अग्रपंक्तिमा रहे । बजार पूँजीकरणमा पनि घटावट देखिंदै कुल पूँजीकरण ४७ खर्ब ११ अर्ब रुपैयाँमा झरेको छ ।

लगातारको उतारचढावले बजारमा अनिश्चितता बढाएको छ । तर कारोबारको मात्रा र केही कम्पनीहरूको सकारात्मक प्रदर्शनले लगानीकर्तालाई पूर्ण निराश हुने अवस्था भने बनाएको छैन । बजार स्थिरता र स्पष्ट नीतिगत मार्गदर्शनको प्रतीक्षामा रहेको देखिन्छ ।