खोज

काठमाडौं, २६ साउन ।

कञ्चनपुरका विपिन जोशीको रिहाइका लागि उनकी आमा पद्मा  जोशी र बहिनी पुष्पा जोशी आज बिहान इजरायल प्रस्थान गरेका छन्। उनीहरू काठमाडौँस्थित त्रिभुवन अन्तर्राष्ट्रिय विमानस्थलबाट फ्लाई दुबईको उडानमार्फत इजरायलतर्फ लागेका हुन्।

विमानस्थलमा प्रवेश गर्ने क्रममा आमा र छोरी भावुक भएका थिए ।

‘सिक्दै कमाउँदै’ (लर्न एन्ड अर्न) कार्यक्रमअन्तर्गत इजरायल पुगेका विपिन जोशी वि.सं. २०८० असोज २० गतेदेखि परिवारको सम्पर्कमा छैनन्। युद्ध सुरु भएको केही समयपछि इजरायली सुरक्षा निकाय आईडीएफले विपिनलाई हमास लडाकुहरूले स्थानान्तरण गरिरहेको भिडिओ सार्वजनिक गरेपछि मात्रै उनको अवस्था पुष्टि भएको थियो। त्यसयता विपिनबारे कुनै आधिकारिक जानकारी आएको छैन।

सुदूरपश्चिम विश्वविद्यालयअन्तर्गत टीकापुर कृषि क्याम्पसका ४९ जना विद्यार्थी २०८० सालको भदौ अन्तिम साता इजरायल गएका थिए। हमासको आतङ्ककारी आक्रमणमा परी त्यहाँ १० जना नेपाली विद्यार्थीको ज्यान गएको थियो। आक्रमणको क्रममा हमासले फालेको ग्रिनेडलाई विपिनले अर्कोतर्फ फालेर साथीहरूलाई जोगाएका थिए। त्यसपछि उनलाई हमास लडाकुहरूले बन्धक बनाएर लगेका थिए।

विपिनको उद्धारका लागि उनका परिवारजनले राष्ट्रपति, प्रधानमन्त्रीसहित उच्च पदस्थ अधिकारीहरूसँग पटक–पटक भेटघाट गरिसकेका छन्। सरकारले कूटनीतिक प्रयास भइरहेको दाबी गरे पनि हालसम्म कुनै ठोस उपलब्धि देखिएको छैन।