खोज

दाङ,२६ साउन ।

दाङ जिल्ला अदालतले बितेको एक वर्षमा करिब ६२ प्रतिशत मुद्दा फर्छ्यौट गरेको छ । जिल्ला अदालतका न्यायाधीश तेजनारायण पौडेलका अनुसार आर्थिक वर्षमा दर्ता भएका कुल पाँच हजार दुई सय २६ मुद्दा मध्ये एक वर्षको अवधिमा तीन हजार दुई सय ६२ अर्थात् ६२ दशमलव ४१ प्रतिशत मुद्दा फर्छ्यौट भएको छ ।

जसमा जिल्ला अदालतमा कार्यरत न्यायाधीशहरू तेजनारायण पौडेलले सात सय ३९, टिकेन्द्र दाहालले तीन सय ७२, रोमाकान्त ज्ञवालीले चार सय ११, राजेश्वर अर्यालले पाँच सय २४, प्रतिमाकुमारी भट्टराई पोखरेलले तीन सय ८१, लालसिंह थापाले छ सय पाँच वटा मुद्दा फर्छ्यौट गरेका छन्  ।

यसै गरी, न्यायाधीश मनोजकुमार श्रीवास्तवले एक सय ७९, ताराकुमारी शर्माले आठ र लोकबहादुर हमालले ४३ वटा मुद्दा तथा रिट निवेदनको छिनोफानो गरेका छन्  । जिल्ला अदालत दाङका सूचना अधिकारी गोकर्ण वलीका अनुसार बितेको एक आर्थिक वर्षमा पारिवारिक विवाद अन्तरगत सम्बन्ध विच्छेदका एक हजार एक सय एक वटा मुद्दा दर्ता भएकोमा आठ सय ९४ वटा फर्छ्यौट भएको छ ।

विवाह सम्बन्धी एक सय २२ मुद्दा दर्ता भएकोमा ९१ मुद्दा फर्छ्यौट भएको छ । अंशबन्डाका सात सय सात मुद्दा दर्ता भएकोमा तीन सय ७४, अपुताली सम्बन्धी १६ मुद्दा दर्ता भएकोमा सात, अन्य शीर्षकमा एक सय ३८ विवाद दर्ता भएकोमा ८३ वटा फर्छ्यौट भएको छ ।

करार सम्बन्धी १९ मुद्दा दर्ता भएकोमा नौ वटा, अनुचित समृद्धि एउटा वटा मुद्दा दर्ता भएकोमा फर्छ्यौट भएको छ । यसै गरी, मिलापत्र बदरका १२ वटा मुद्दा दर्ता भएकोमा चार वटा, फैसला बदरका २२ वटा मुद्दा दर्ता भएकोमा ११ वटा, अन्य १२ वटा मुद्दा दर्ता भएकोमा १० वटा फर्छ्यौट भएको छ । सार्वजनिक शान्ति विरुद्धको कसुरमा ११ वटा मुद्दा दर्ता भएकोमा सबै फर्छ्यौट भएको छ ।

सम्पत्ति अन्तर्गत जग्गा सम्बन्धी एक सय १७ मुद्दा दर्ता भएकोमा ५०, लेनदेनका तीन सय ९३ मुद्दा दर्ता भएकोमा दुई सय १०, सार्वजनिक जग्गाका छ मुद्दा दर्ता भएकोमा एउटा, लिखत बदरका तीन सय नौ मुद्दा दर्ता भएकोमा एक सय ५३, घर बहालको एउटा वटा मुद्दा दर्ता भएकोमा उक्त मुद्दा फर्छ्यौट भएको छ भने अन्य शीर्षकमा आठ वटा मुद्दाको फर्छ्यौट हुन बाँकी छ ।

बहुविवाहका २८ मुद्दा दर्ता भएकोमा १४ वटा, बालविवाहका चार वटा मुद्दा दर्ता भएकोमा दुई वटा, कर्तव्य ज्यानका ४२ वटा मुद्दा दर्ता भएकोमा २० वटा, ज्यान मार्ने उद्योगका ४० वटा मुद्दा दर्ता भएकोमा २८ वटा, आत्महत्या दुरुत्साहनका १३ मुद्दा दर्ता भएकोमा १२ वटा फर्छ्यौट भएको छ ।

जबरजस्ती करणी सम्बन्धी एक सय ५६ मुद्दा दर्ता भएकोमा ७४ वटा, हाडनाता करणीका १६ मुद्दा दर्ता भएकोमा ५ वटा, जबरजस्ती करणी उद्योगका १३ मुद्दा दर्ता भएकोमा १० वटा बाल यौन दुरुपयोगका पाँच मुद्दा दर्ता भएकोमा तीन वटा फर्छ्यौट भएको छ ।

जिल्ला अदालतमा दर्ता भएका मुद्दा मध्ये अब एक हजार नौ सय ६४ मुद्दा चालु आर्थिक वर्षमा जिम्मेवारी सरी आएको सूचना अधिकारी वलीले बताए ।  दुई वर्ष नाघेका मुद्दाको सङ्ख्या शून्यमा झरेको छ ।