खोज

बुटवल, २५ साउन ।

एक कार्यक्रममा वक्ताहरूले सभ्य र मर्यादित समाज निर्माणमा युवाहरूको भूमिका अत्यन्त महत्वपूर्ण हुनेमा जोड दिएका छन्। उनीहरूले राजनीतिक, सामाजिक र आर्थिक सबै क्षेत्रमा युवाको अग्रसरता आवश्यक रहेको उल्लेख गर्दै समाज रूपान्तरणमा गम्भीर रूपमा लाग्न आग्रह गरे।

नेपाल रेडक्रस सोसाइटी रुपन्देहीका अनुसार हाल अस्पतालमा बिरामीका लागि रगतको अभाव देखिएको छ। यस समस्याको समाधानका लागि विभिन्न संघ–संस्था र कार्यालयहरूले नियमित रक्तदान अभियान सञ्चालन गर्दै आएका छन्। सोही क्रममा एक्सपर्ट एजुकेशन एण्ड भिसा सर्भिसेसको २२औँ वार्षिकोत्सवको अवसरमा सामाजिक उत्तरदायित्व स्वरूप बुटवलमा रक्तदान कार्यक्रम सम्पन्न गरिएको हो।

कार्यक्रम संयोजक अभ्युदय ढकालका अनुसार अस्पताल र रक्त संचार सेवा केन्द्रमा रगतको अभाव हुन नदिने उद्देश्यले आयोजना गरिएको कार्यक्रममा ४३ युनिट रगत संकलन भएको छ। नेपाल नियमित रक्तदाता संघ र नेपाल रेडक्रस सोसाइटीको सहकार्यमा बुटवल शाखाले राजमार्ग चौराहामा कार्यक्रम सम्पन्न गरेको हो।

बुटवल उपमहानगरपालिका–९ का वडाध्यक्ष प्रदीप कुमार श्रेष्ठले रक्तदानको महत्वबारे प्रकाश पार्दै यस्ता सामाजिक अभियानमा स्थानीय समुदायको सक्रिय सहभागिता अपरिहार्य रहेको बताए।

ईलाका प्रहरी कार्यालयका प्रमुख, प्रहरी नायव उपरीक्षक इन्द्रबहादुर रानाले युवाहरूलाई व्यक्तित्व विकास, सामाजिक उत्तरदायित्व तथा सभ्य, व्यवस्थित र सुसंस्कृत समाज निर्माणमा अग्रसर हुनुपर्ने आवश्यकता औंल्याए। उनले शान्ति–सुरक्षा कायम गर्न खटिएका प्रहरीलाई सहयोग गर्नु पनि नागरिकको महत्वपूर्ण दायित्व भएको स्मरण गराउँदै, युवावर्गले अब गम्भीर रूपमा समाजको रूपान्तरणबारे सोच्नुपर्ने समय आएको बताए।

संस्थाका प्रमुख शंकर सापकोटाले विगतका वर्षझैँ यस वर्ष पनि सरसफाइ, हरियाली प्रवर्द्धन र रक्तदानजस्ता सामाजिक गतिविधिलाई निरन्तरता दिइएको उल्लेख गरे। संयोजक ढकालका अनुसार रक्तदान केवल रगत संकलनका लागि मात्र नभई रक्तदातामा जनचेतना अभिवृद्धि गर्ने, युवामा सामाजिक जिम्मेवारीको भावना विकास गर्ने र “रक्तदान नै जीवनदान हो” भन्ने सन्देश फैलाउने उद्देश्यले आयोजना गरिएको हो।