खोज

काठमाडौं, २५ साउन ।

राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले पार्टीमा विगतमा देखिएको फुटको प्रवृत्ति अब अन्त्य भएको दाबी गरेका छन्। उनले राप्रपालाई विभाजन गर्ने कुनै कारण पनि छैन र त्यसको तागत कसैसँग छैन भन्दै पार्टी अब स्थायित्वतर्फ उन्मुख भएको बताएका छन्।

न्युज एजेन्सीसँगको कुराकानीमा लिङ्देनले विगतमा पार्टीभित्र चित्त नबुझ्ने बित्तिकै फुटाउने प्रवृत्ति रहेको स्मरण गर्दै त्यसका केही अवशेष अझै देखिए पनि त्यो सम्भावना समाप्त भएको बताए। उनका अनुसार अहिले पार्टीभित्र देखिएका असहमति र मतभेदहरूलाई संस्थागत छलफल र समितिगत प्रक्रियामार्फत समाधान गर्ने प्रयास भइरहेको छ।

उनले भने, “पार्टी भनेको समान विचारका मानिसहरूको संस्था हो। त्यसमा पद्धति र अनुशासन हुन्छ। चित्त नबुझे समिति भित्र छलफल गर्ने, त्यसबाट समाधान निस्केन भने महाधिवेशनको माध्यमबाट निर्णय गर्ने हो।”

अध्यक्ष लिङ्देनले असन्तुष्ट पक्षले पार्टी विधानविपरीत काम गरिरहेको आरोप समेत लगाए। उनले विधानअनुसार अध्यक्षलाई समितिहरू गठन गर्ने, जिम्मेवारी तोक्ने र हेरफेर गर्ने अधिकार रहेको स्पष्ट गरे।

फरक प्रसंगमा लिङ्देनले नेपालजस्तो भूराजनीतिक संवेदनशीलता भएको देशमा राजसंस्थाको आवश्यकता औंल्याउँदै, राप्रपा निरन्तर राजसंस्थाको पुनःस्थापनाका पक्षमा आवाज उठाइरहेको पनि बताए। उनका अनुसार पछिल्लो समय राजसंस्थाको पक्षमा जनमत र माहोल बढ्दो छ।