खोज

काठमाडौं, २५ साउन ।

एएफसी यू-२० महिला एसियन कप छनोट अन्तर्गत समूह ‘ए’ को अन्तिम खेलमा नेपाल उत्तर कोरियासँग ११–० को भारी अन्तरले पराजित भएको छ । भुटानको थिम्पुस्थित चाङलिमिथाङ स्टेडियममा आइतबार भएको खेलमा उत्तर कोरियाले पहिलो हाफमा ५ र दोस्रो हाफमा ६ गोल गर्दै नेपालको सम्भावनामा पूर्णविराम लगायो ।

यो हारसँगै नेपाल छनोट चरणबाट बाहिरिएको छ । समूहको तीन खेलमध्ये दुई जित र एक बराबरीसहित ९ अंक जोडेको उत्तर कोरिया समूह विजेता बन्दै अर्को वर्ष थाइल्याण्डमा हुने एएफसी यू–२० महिला एसियन कपको अन्तिम चरणमा प्रवेश गर्‍यो । उत्तर कोरिया यस प्रतियोगिताको साविक विजेता समेत हो, र उसले तीन खेलमा ३६ गोल गर्दै एक गोल पनि नखाई अपराजित यात्रा सम्पन्न गर्‍यो ।

नेपालले भने तीन खेलबाट ४ अंक जोड्यो — पहिलो खेलमा भुटानसँग १–१ को बराबरी खेलेको नेपालले दोस्रो खेलमा साउदी अरेबियामाथि १–० को जित निकालेको थियो । तर अन्तिम खेलमा उत्तर कोरियासँगको यो पराजयले नेपाललाई समूह चरणमै रोकिएको छ ।

छनोटको प्रावधानअनुसार आठ समूह विजेता सिधा छनोट हुन्छन् भने आठ उपविजेतामध्ये उत्कृष्ट तीन टोली मात्र अन्तिम चरणमा पुग्न सक्छन् । तर अन्य समूहमा दोस्रो हुने टोलीहरूले छ अंक जोडिसकेकाले नेपालले उत्कृष्ट उपविजेता बन्ने सम्भावना समेत गुमाएको छ ।

नेपालले प्रारम्भिक चरणमा देखाएको सुधारप्रति आशा राखिए पनि उत्तर कोरियाको दबदबाका अगाडि उभिन नसक्नु दुर्भाग्यपूर्ण रह्यो । अब नेपाली टोलीका लागि यो प्रतियोगिता अनुभवको पाठशाला बनेको छ ।