खोज

बुटवल, २५ साउन

बुटवल सेरोफेरो हङकङका आजीवन सदस्यहरूको सहयोगमा रुपन्देहीका विभिन्न स्वास्थ्य संस्थामा २० थान ह्विलचेयर वितरण गरिएको छ। लुम्बिनी प्रादेशिक अस्पताल, देवदह नगर अस्पताल, केरवानी स्वास्थ्य चौकी र सिक्टहन स्वास्थ्य चौकीलाई गरी करिब साढे चार लाख रुपैयाँ बराबरका ह्विलचेयर हस्तान्तरण गरिएको हो।

आईतबार आयोजित एक कार्यक्रममा डा. नेत्र रानाले लुम्बिनी प्रादेशिक अस्पतालको आपतकालीन विभागका इञ्चार्ज रामु अर्याल, विभागीय प्रमुख डा. सुनिल सुनार र फिजियोथेरापी विभागका इञ्चार्ज अरुण ठाकुरलाई ह्विलचेयर हस्तान्तरण गरे।

“विदेशमा भए पनि आफ्नै देश र समुदायप्रति सहयोग गर्ने भावना देखिएको छ, यो महत्वपूर्ण कार्य हो,” आपतकालीन विभागका इञ्चार्ज रामु अर्यालले भने।

डा. रानाका अनुसार लुम्बिनी प्रादेशिक अस्पताललाई १५, देवदह नगर अस्पताललाई २, केरवानी स्वास्थ्य चौकीलाई १, सिक्टहन स्वास्थ्य चौकीलाई १ र अर्घाखाँचीका एक अपांगता भएका व्यक्तिलाई १ थान ह्विलचेयर प्रदान गरिएको हो। उनले यो पहल अस्पतालमा सेवाग्राहीलाई सहज हुने सामग्री उपलब्ध गराउने उद्देश्यले गरिएको बताए।

बुटवल सेरोफेरो हङकङका आजीवन सदस्य तथा संस्कृति ज्वेलर्स हङकङका सञ्चालक प्रकाश थापाबाट १०, बाबुराम क्षेत्रीबाट ५ र राना परिवारबाट ५ थान ह्विलचेयर सहयोग प्राप्त भएको उनले जानकारी दिए।

उनका अनुसार आगामी दिनमा अझ ठूलो सहयोगका लागि पनि पहल भइरहेको छ। साथै, प्रादेशिक अस्पतालको कुरुवा भवनमा गर्मीका कारण हुने असुविधा कम गर्न एसी जडानको समेत पहल भइरहेको उनले बताए।