खोज

 नेपालगन्ज, २५ साउन ।

“भाषा, संस्कृति तथा परम्पराको जगेर्ना गरौँ“ भन्ने मूल नारासहित नेवा पुनः बाँकेको आयोजनामा आइतबार नेपालगन्जमा रङ्गिन गाईजात्रा (साःपारु) निकालिएको छ ।

सात परिवारले आफ्नो एक वर्षभित्र दिवङ्गत भएका आफन्तको सम्झनामा सामूहिक रूपमा गाईजात्रा निकालेका हुन् । नेपालगन्जको सुर्खेतरोडस्थित स्वस्तिक कटेजबाट सुरु भएको गाईजात्रा धम्बोझीचोक, सहिद सेतु बिकचोक, न्यूरोड हुँदै बागेश्वरी मन्दिर पार्कमा पुगेर सम्पन्न भयो ।

यो अवसरमा नेवारी पोसाकमा सुसज्जित महिला–पुरुषले नेवारी भाषाका गीतमा नाच प्रस्तुत गरे भने लाखे नाचले भीडलाई अझ आकर्षित बनायो । गाईजात्राको सांस्कृतिक मान्यता अनुसार, एक वर्षभित्र दिवङ्गत भएका आत्माहरू गाईको पुच्छर समाएर बैतरणी पार गर्छन् भन्ने विश्वास रहिआएको छ ।

त्यसैले मृतकको सम्झनामा गाई वा मानिसलाई गाईको रूपमा सिँगारी नगर–नगर परिक्रमा गराउने परम्परा छ । यस वर्षको गाईजात्रा कमलादेवी श्रेष्ठ, राधादेवी श्रेष्ठ, सुशीला चुके, दमयन्ती श्रेष्ठ, माधवलाल श्रेष्ठ, केदारप्रसाद श्रेष्ठ र दिपाकुमारी रेग्मी श्रेष्ठको सम्झनामा निकालिएको थियो ।

सहभागी परिवारका अनुहारमा मृतकप्रति पीडा त थियो नै, तर आफ्नो संस्कृति र परम्परा जोगाउन पाएको गर्व पनि झल्किन्थ्यो ।