खोज

बुटवल, २१ साउन ।
रोटरी क्लब अफ बुटवल डाउनटाउनले आफ्ना पदाधिकारीहरूको क्षमता अभिवृद्धिका लागि क्लब अफिसर लर्निङ सेमिनार सम्पन्न गरेको छ । कार्यक्रममा क्लबका एजी शिवप्रसाद गौडेलले पेशा र व्यवसायमा व्यस्तताका बाबजुद सामाजिक उत्तरदायित्व वहन गर्न रोटरी जस्तो संस्था महत्वपूर्ण रहने बताए ।

जीवनभर सिकाइको प्रक्रिया निरन्तर हुने बताउँदै यस्ता तालिमहरू ब्यक्तित्व र संस्थागत विकासका लागि अत्यावश्यक रहेको बताए । सन् १९०५ मा अमेरिकाको शिकागोमा पॉल पी. हैरिसले स्थापना गरेका रोटरीको मूल उद्देश्य पेशागत, नेतृत्व र सेवा माध्यमबाट शान्ति, स्वास्थ्य, शिक्षा, वातावरण संरक्षण तथा स्वच्छपानी जस्ता क्षेत्रमा योगदान पु¥याउनु रहेको उनले बताए ।

कार्यक्रममा रोटरी गर्भमेन्ट रिलेसन चेयर तथा क्लबका पूर्वअध्यक्ष राजेन्द्र ढकालले रोटरी सदस्यताको लचकता, अन्तर्राष्ट्रिय संरचना र संस्थागत योगदानको महत्त्वबारे प्रशिक्षण दिए । उनले आरआई र डिष्ट्रिकतर्फ गरिने नियमित रिपोर्टिङका प्रक्रियाहरू पनि स्पष्ट पारे ।

सेमिनारमा क्लबका पूर्वअध्यक्ष तथा डिष्ट्रिक मेम्बर रिटेन्सन को–चेयर नरबहादुर श्रीषले क्लब प्रशासनको भूमिकाबारे प्रकाश पारे । कार्ययोजना बनाउनेदेखि मिटिङको व्यवस्थापन र अन्तरक्रियामार्फत सदस्यहरूको समझदारी बढाउन प्रशासनको जिम्मेवारी हुने उनले बताए ।

कार्यक्रममा सहभागी डिष्ट्रिक मेम्बर चेयर लक्ष्मण ज्ञवालीले रोटरीको सबैभन्दा चर्चित परियोजना विश्वव्यापी पोलियो उन्मूलनमा ऐतिहासिक सफलता भएको भन्दै क्लबहरु डिष्ट्रिकमा वृहत परियोजनातर्फ लाग्न सुझाव दिए ।

कार्यक्रममा रिजन ५ का ट्रेनिङ चेयर बासुदेव घिमिरे, सर्भिस प्रोजेक्ट चेयर पिताम्बर ज्ञवाली, निवर्तमान अध्यक्ष शिव ज्ञवाली, सचिव केशव बश्यालले क्लबमा आवद्ध भएसंगै हरेक सदस्य आफनो अधिकार र उत्तरदायित्वप्रति जानकार हुनुपर्ने बताउदै समाजसेवाको मुल उदेश्य प्राप्तीमा लाग्न सुझाव दिए ।

कार्यक्रममा अध्यक्ष बाबुराम बन्जाडेले सामाजिक उत्तरदायित्व अन्तर्गत डिष्ट्रिकबाट धेरै परियोजना स्वीकृत हुन गैरहेको भन्दै अर्घाखाँचीको कुमाल गाउँमा १०० घरधुरीलाई विद्युतीय चुलो वितरण गर्ने आगामी परियोजनाबारे पनि जानकारी दिए ।