खोज

बर्दिया, २२ साउन ।

बर्दिया जिल्लाको बढैयाताल गाउँपालिका वडा नम्बर ८ मा अवस्थित बर्दिया एकेडेमीले कक्षा १२ को परीक्षामा शतप्रतिशत विद्यार्थी उत्तीर्ण गराउँदै जिल्लामै उदाहरणीय सफलता हासिल गरेको छ । राष्ट्रिय परीक्षा बोर्डद्वारा २०८१ साल वैशाख १४ गतेदेखि सञ्चालन गरिएको कक्षा १२ को परीक्षामा सहभागी भएका एकेडेमीका ६१ जना विद्यार्थीमध्ये सबै उत्तीर्ण भएका छन् ।

साउन १९ गते प्रकाशित नतिजामा बर्दिया एकेडेमीको नतिजा जिल्लाका अन्य निजी तथा सार्वजनिक शैक्षिक संस्थाहरूमध्ये उल्लेखनीय रहन गएको छ । विद्यालयले दिएको जानकारी अनुसार ९ जना विद्यार्थीले ३.६० जिपिए भन्दा माथि ल्याउन सफल भएका छन् भने ५२ जनाले ३.०० जिपिएभन्दा बढी अंक प्राप्त गरेका छन् ।

सबैभन्दा उत्कृष्ट प्रदर्शन समिर बर्सौलाले गरेका प्राप्त छन्, जसले ३.८२ जिपिए ल्याएर विद्यालयकै मात्र होइन, जिल्लाभरका विद्यार्थीमध्ये पनि अग्रणी स्थान हासिल गरेका छन् । एकेडेमीका प्रिन्सिपल भोजराज बरालका अनुसार “शैक्षिक नतिजामा मात्रै होइन, समग्र व्यक्तित्व विकासलाई ध्यानमा राखेर हामीले सिकाइको वातावरण तयार गरेका छौँ । निरन्तर अभ्यास, अनुभवी शिक्षकहरूको साथ, विद्यार्थीको परिश्रम र अभिभावकको सहयोग नै यस पटकको सफलता पछाडिको मुख्य कारण हो ।”

बर्दिया एकेडेमीले यसअघि पनि यस्ता सफलता दोहो¥याउँदै आएको छ । २०७४ सालदेखि कक्षा १२ सञ्चालनमा ल्याएको एकेडेमीको पहिलो र दोस्रो ब्याचका विद्यार्थीहरू समेत जिल्लामै प्रथम स्थान प्राप्त गर्न सफल भएका थिए । यस पटकको परिणामले विगतका सफलतालाई निरन्तरता दिएको छ ।

२०७४ सालमा कक्षा १२ सुरु गरे पनि बर्दिया एकेडेमीको स्थापना भने २०६७ सालमा भएको हो । सुरुवाती चरणमा सानो आकारमा सञ्चालन भएको यो शैक्षिक संस्था अहिले जिल्लाकै प्रतिष्ठित निजी विद्यालयहरूमध्ये एक मानिन्छ । हाल एकेडेमीमा करिब १ हजार ४ सय विद्यार्थी अध्ययनरत छन् भने ५८ जना शिक्षक र ३२ जना अन्य कर्मचारीसहित ९० जना जनशक्ति खटिएको छ ।

भौतिक पूर्वाधारका हिसाबले पनि बर्दिया एकेडेमी सुसज्जित छ । विद्यालयमा आफ्नै यातायात सेवा, शुद्ध खानेपानीको व्यवस्था, बालमैत्री खेलकुद सामग्री, सफा तथा सुरक्षित भवन, सिकाइमैत्री कक्षाकोठा, प्रयोगशाला, कम्प्युटर कक्षा र पुस्तकालयजस्ता सेवा उपलब्ध छन् ।

“हामी विद्यार्थीकै भविष्य निर्माण गर्ने उद्देश्यले हरेक पक्षलाई सन्तुलनमा राख्ने प्रयास गर्दै आएका छौँ,” प्रिन्सिपल बरालले भने, “हामी नतिजामा मात्र होइन, विद्यार्थीको व्यवहार, आत्मविश्वास, जिम्मेवारी बोध र नेतृत्व क्षमताको विकासमा पनि विशेष ध्यान दिने गर्छौँ ।”

विद्यालयले अतिरिक्त क्रियाकलापलाई पनि प्राथमिकतामा राखेको छ । कला, सङ्गीत, खेलकुद, वादविवाद, वक्तृत्वकला, समाजसेवा लगायतका विविध गतिविधिमा विद्यार्थीलाई संलग्न गराउने गरिएको छ । यसले विद्यार्थीलाई व्यवहारिक ज्ञानको अनुभूति दिलाउनुका साथै प्रतिस्पर्धात्मक क्षमतामा वृद्धि गर्ने विश्वास एकेडेमीको छ ।

विद्यालयले कक्षा ८ को अन्त्यमा पालिकाले सञ्चालन गर्ने परीक्षा, कक्षा १० को एसइई परीक्षा र कक्षा १२ को राष्ट्रिय परीक्षा बोर्डको परीक्षामा समेत उत्कृष्ट नतिजा हासिल गर्दै आएको दाबी गरेको छ । “यस संस्थाले निरन्तर रूपमा सबै तहमा उल्लेखनीय शैक्षिक परिणाम दिँदै आएको छ, जसले गर्दा विद्यार्थी र अभिभावक दुवैको विश्वास जित्न सफल भएको छ,” एकेडेमीद्वारा जारी विज्ञप्तिमा उल्लेख गरिएको छ ।

यस सफलताले बर्दिया एकेडेमी मात्र होइन, बर्दिया जिल्लाकै शैक्षिक क्षितिजमा सकारात्मक सन्देश दिएको छ । विद्यार्थीको मेहनत, शिक्षकको समर्पण र व्यवस्थापनको दीर्घ दृष्टिले हासिल गरिएको यस्तो नतिजाले अन्य शिक्षण संस्थाका लागि पनि प्रेरणा बन्ने अपेक्षा गरिएको छ ।