खोज

लमही ,१९ साउन ।

दाङको तुलसीपुर उपमहानगरपालिकाका प्रमुख टिकाराम खड्काले चलचित्रमा अभिनय गर्ने भका छन् । नगरप्रमुख खड्काले दाङमै छायाङ्कन हुने नेपाली चलचित्र ‘जदौ’मा अभिनय गर्न लागेको बताए  ।

अन्तरजातीय प्रेम सम्बन्धमा आधारित यो चलचित्रमा आफूलाई सुहाउने भूमिका भएकाले अभिनय गर्ने निर्णय गरेको मेयर खड्काले बताए ।

उनले स्थानीय कला, संस्कृति र समाजका कथालाई चलचित्रमार्फत उजागर गर्न पाउनु गर्वको विषय भएको प्रतिक्रिया दिए ।काजी लिम्बू र अञ्जन शर्माको संयुक्त निर्देशनमा बन्न लागेको चलचित्र आगामी भदौ पहिलो साताबाट छायाङ्कन थालिनेछ ।

सिल्भर स्क्रिन इन्टरटेन्मेन्ट र समिश्रण मुभिज एन्ड इन्टरटेन्मेन्टको संयुक्त निर्माणमा तयार हुँदै गरेको यो चलचित्र यसै वर्ष प्रदर्शन गर्ने तयारी छ ।

चलचित्रमा मेयर खड्कासहित कलाकारहरू मुकुन भुसाल, नीति शाह, प्रभात पाल, सन्ध्या श्रेष्ठ, ऋचा शर्मा, अनिल सुब्बा र सिपी पुडासैनी (धतुरे) लगायतले अभिनय गर्नेछन् ।

चलचित्रमा राम राजा सुवेदी, ओम चेम्जोङ, सुमीत्रा देवकोटा, नारायण शास्त्री, गोकुल केसी, अर्जुन खड्का, काजी केसी, सृजना शर्मा, दीपक पोखरेल र मनिष शर्मा सह निर्मातामा रहेका छन् ।

श्याम तामाङले छायाङ्कन गर्ने चलचित्रको निर्माण व्यवस्थापन बुद्धिलाल माझी (देवा) ले गर्ने  छन्

भने कला निर्देशन चिरञ्जीवी भण्डारी र द्वन्द्व निर्देशन मिलन श्रेष्ठले गर्नुहुने भएको छ । मुख्य सहायक निर्देशक विनयराज पौडेल रहेको चलचित्रका गीतमा बाबुल गिरी र सरोज पोखरेलको सङ्गीत रहनेछ ।

दाङको सामाजिक परिवेश र अन्तरजातीय प्रेमकथा उठान गर्ने यो चलचित्रले स्थानीय स्तरमै मात्र नभई राष्ट्रिय स्तरमा समेत चर्चा पाउने अपेक्षा गरिएको छ ।