खोज

काठमाडौं , १९ साउन ।

अघिल्ला तीन कारोबार दिन लगातार गिरावट आएको शेयर बजार आज सोमबार सम्हालिएको छ। नेप्से परिसूचक आज ८.६२ अंकले बढ्दै २,८६७ अंकमा पुगेको छ।

गत मंगलबार ३,००२ अंकको उच्च बिन्दु छोएको बजार त्यसयता लगातार ओरालो लागेको थियो। आइतबारसम्म बजार १४४ अंकले घटेर २,८५८ मा झरेको थियो।

आजको कारोबार अवधिभर बजार केही उतारचढावमै रह्यो। दिउँसो १:१२ बजे नेप्से २,८३३ अंकमा झरेको थियो भने २:३४ बजे पुनः २,८८९ अंकको उच्चतम बिन्दु छोएको देखिएको छ। यद्यपि समग्रमा बजार सकारात्मक रहेर बन्द भयो।

बजार सम्हालिए पनि कुल कारोबार रकम भने घटेको छ। आइतबार १३ अर्ब ७ करोड रुपैयाँको कारोबार भएकोमा आज १० अर्ब ८२ करोड रुपैयाँमा सीमित रह्यो। कारोबार भएका कम्पनीमध्ये १४० कम्पनीको मूल्य वृद्धि हुँदा ११० कम्पनीको मूल्य घट्यो।

उद्योगगत समूह हेर्दा बैंकिङ, जीवन बीमा, माइक्रोफाइनान्स, र हाइड्रोपावर समूहमा सामान्य वृद्धि देखिएको छ। बैंकिङ समूह ०.६८ प्रतिशतले बढ्दा, जीवन बीमा ०.४३ प्रतिशतले, माइक्रोफाइनान्स ०.५६ प्रतिशतले, र हाइड्रोपावर ०.०९ प्रतिशतले उकालो लागेका छन्।

उता होटल तथा पर्यटन, उत्पादन तथा प्रशोधन, अन्य, निर्जीवन बीमा, र फाइनान्स समूह भने ऋणात्मक देखिए।

कम्पनीगत रुपमा सिक्लेस हाइड्रोपावरको सेयर मूल्य ५.७३ प्रतिशतले, स्वेतगंगा हाइड्रोपावरको ५.१२ प्रतिशतले, र विन्ध्यबासिनी हाइड्रोपावरको ४.७२ प्रतिशतले वृद्धि भयो। माछापुच्छ्रे बैंकको सेयर पनि ४.५१ प्रतिशतले बढेको छ।

अघिल्लो दिनसम्म १० प्रतिशतले वृद्धि भएको ट्रेड टावरको सेयर मूल्य आज त्यति नै अनुपातमा घट्यो। यस्तै, थ्रीस्टार हाइड्रोपावर, नेपाल फाइनान्स, र सप्तकोशी विकास बैंकको मूल्यमा समेत उल्लेखनीय गिरावट देखियो।

आजको दिन सबैभन्दा धेरै कारोबार भएका कम्पनीहरूमा हिमालयन रिइन्स्योरेन्स, शिवम् सिमेन्ट, हिमालयन डिस्टिलरी, ङादी ग्रुप पावर, र नेपाल पुनर्बीमा अग्रपंक्तिमा रहेका छन्।