खोज

बुटवल, १९ साउन ।

लायन्स इन्टरनेशनल डिष्ट्रिक ३२५ पि अन्तर्गत एरिया ४ का रिजन ११ अन्तर्गतका ११ क्लबको मेघा पदस्थापन समारोह बुटवलमा भव्य रूपमा सम्पन्न भएको छ ।

कार्यक्रमको उद्घाटन गर्दै डिष्ट्रिक गभर्नर बालाराम भट्टराईले नयाँ नेतृत्वको सुरुवातसँगै सदस्यता वृद्धि र प्रभावशाली परियोजनामा जोड दिन आग्रह गरे । लायन्स सधै सेवा भावनालाई केन्द्रमा राखेर काम गर्ने हुदा समाजमा प्रभावकारी परियोजनालाई जोड दिनुपर्ने उनको सुझाव छ ।

गभर्नर भट्टराईले क्लबहरूले अघिल्लो वर्ष गरेका परियोजनाहरूको गम्भीर समीक्षा गर्दै नयाँ सामाजिक परियोजनाहरू अघि बढाइने बताए । समाजमा आफ्नो पहिचान बनाइसकेको लायन्सका प्रत्येक क्लब पहिलो बन्ने लक्ष्यसहित सेवा विस्तारमा लाग्न उनले सुझाव दिए । उनका अनुसार, यो वर्ष डिष्ट्रिकमा १४९९ जना नयाँ सदस्य भित्र्याउने लक्ष्य लिइएको तथा सन् २०२७ सम्म १५ लाख सदस्य पुयाउने लक्ष्यसहित ‘मिशन १.५’ अभियान अगाडि बढाइएको उनले बताए ।

कार्यक्रममा पूर्व गभर्नर अर्जुनमान सैजु, डिष्ट्रिक एडभाइजर कुसुमराज ज्ञवाली, रिजन ११ का चेयरपर्सन दिपक गौतम, जोन २३ की चेयरपर्सन लता खड्का, जोन २४ का चेयरपर्सन लोकप्रसाद भण्डारी, जोन २५ की चेयरपर्सन सृजना श्रेष्ठले नया सदस्य क्लबमा भित्रनेमात्र नभई आफ्नो जिम्मेवारी अनुसार लाग्न जरुरी रहेको बताए ।

कार्यक्रममा निवर्तमान गभर्नर पुरुषोत्तम भक्त प्रधानाङले लायन्स, ग्लोबल उद्देश्य र स्थानीय अभियानका बारेमा प्रकाश पारे । ग्लोबल कज अन्तर्गत ९ मुख्य क्षेत्रमा कार्य गर्दै समुदायका लक्षित वर्गहरूमा सेवा पु–याउने योजनासमेत उनले सार्वजनिक गरे । लायन्स ईन्टरनेश्नलमा हाल विश्वभर १४ लाख ५० हजार सदस्य रहेको उनले बताए । डिष्ट्रिकमा ३५ सय बढी सक्रिय सदस्य रहेको तथा क्लब सदस्य विस्तार र प्रभावकारी सेवामा जोड दिएको उनले बताए ।

कार्यक्रममा एलसी बुटवल शुभपाईला क्लबकी अध्यक्ष पुष्पा कंडेलले चार्टर क्लबको नेतृत्व सम्हाल्दै स्थानीय समुदायमा शिक्षा, स्वास्थ्यको क्षेत्रमा योगदान दिने प्रतिबद्धता जनाईन ।

कार्यक्रममा लायन्स क्लब अफ बटौलीका अध्यक्ष विष्णु प्रसाद गौतमले लायनबादको मूल मर्म अनुसार समुदायमा ट्राफिक सचेतना, वातावरण संरक्षण र सदस्यता अभिवृद्धि जस्ता अभियानलाई सशक्त बनाउँदै लायन दर्शनप्रति अभिमुखीकरणमा लाग्ने बताए ।