खोज

गुल्मी, १९ साउन ।

अविरल वर्षाका कारण गए रातिदेखि कालीगण्डकी करिडोर सहित जिल्लाका तीनवटा मुख्य सडकहरु अवरुद्ध बनेका छन् । जिल्लाको कालीगण्डकी करिडोर, रिडी–तम्घास र रिडी–वामीटक्सार सडक आईतबार रातीदेखि अवरुद्ध बनेको जिल्ला प्रहरी कार्यालय गुल्मीका सूचना अधिकरी गंगाबहादुर सारुले जानकारी दिएका छन् ।

कालीगण्डकी करिडोर सडक अन्र्तगत कालीगण्डकी गाउँपालिका –१ स्थित गरगरे, वडा नम्बर –२ को मिल्क र वडा नम्बर –३ स्थित कनौटामा सडक माथिबाट चट्टान सहितको ठूलो पहिरो खसेपछि उक्त सडक पूर्णरुपमा अवरुद्ध बनेको हो ।

लगातार वर्षाको कारण रिडी–तम्घास सडकखण्ड अन्तर्गत रुरुक्षेत्र गाउँपालिका –३ स्थित सल्लेरीमा पहिरो खस्दा उक्त सडक पनि पूर्णरुपमा अवरुद्ध बनेको जिल्ला प्रहरी कार्यालय गुल्मीले जनाएको छ । त्यसैगरी रिडी–वामीटक्सार सडकखण्ड अन्तर्गत सत्यवती गाउँपालिका –६ स्थित डहरे खोला र वडा नं. ५ को बाँदरेभीरमा बाढी र पहिरोका कारण गए रातिदेखि उक्त सडक समेत पूर्णरुपमा अवरुद्ध बनेको जिल्ला प्रहरी कार्यालय गुल्मीका सूचना अधिकारी सारुले बताए ।

उक्त क्षेत्रमा अहिले पनि लगातार रुपमा वर्षा भैरहेको कारण वर्षा नरोकिएसम्म अवरुद्ध सडक सुचारु गर्न समस्या परेको जिल्ला प्रहरी कार्यालय गुल्मीले जनाएको छ । कालीगण्डकी करिडोर र रिडी–वामीटक्सार सडक पटक पटक बन्द हुँदा त्यस क्षेत्रका नागरिकहरुले समस्या भोग्दै आइरहेका छन् ।

लगातारको वर्षाको कारण बडिगाड खोलामा पनि पानीको सतह बढ्दै गएको छ । जिल्ला प्रशासन कार्यालय गुल्मीले खोला टटीय क्षेत्रका वासिन्दाहरुलाई सतर्कता अपनाउन र सुरक्षित ठाउँमा बसोबास गर्न आग्रह गरेको छ । जिल्ला विपत् व्यवस्थापन समिति गुल्मीले जिल्लाका करिब दुई सय भन्दा बढी स्थानहरुलाई बाढी र पहिरोको उच्च जोखिममा राखेको छ ।