खोज

समाचार सारांश

• ---

  पहिले राहदानी बनाउन तौलिहवा वा काठमाडौँ जानुपर्थ्यो, अब चन्द्रौटाबाटै राहदानी बन्न थालेको छ । 

  

• काठमाडौँजस्तो टाढा ठाउँ जानु परेमा एक दिनको आम्दानी खर्चिने बाध्यता हटेको छ ।

• पालोको स्पष्टता, सूचना पाटी र जनशक्ति व्यवस्थापनमार्फत सेवा प्रभावकारी बनाइएको छ ।

  ---

चन्द्रौटा, १९ साउन ।
“पहिले राहदानी बनाउन जिल्लाको सदरमुकाम तौलिहवा जानुपर्दथ्यो । अहिले चन्द्रौटाबाट बन्न थालेपछि समय र पैसाको बचत हुँदा हर्षित छु”  कपिलवस्तु शिवराज नगरपालिका वडा नम्बर–८ का २१ वर्षीय इजाज अहमद मुसलमान भने ।

आवेदन दिएको २५ दिनमा इलाका प्रशासन कार्यालय चन्द्रौटाबाट राहदानी पाएको उनले खुसी व्यक्ति गरे । विजयनगर गाउँपालिका, कृष्णनगर, शिवराज नगरपालिकाका स्थानीयबासीहरूले सेवा लिन सक्ने प्रशासन कार्यालयले जनाएको छ ।

केही महिना अघिदेखि त्यहाँबाट सेवा सुचारु गरेपछि प्रभावकारी भएको अर्का सेवाग्राही लक्ष्मण खटिकले बताए । दिनभरिको समय खर्चिएर पनि काम नहुने गुनासो रहेको बताउँदै सामान्यतया राहदानी बनाउन काठमाडौँ, तौलिहवा लगायत स्थानमा जानुपर्ने बाध्यता हटेको उनले बताए ।

जिल्लाको सुदूरपश्चिममा पर्ने गाउँपालिकाका सेवाग्राही गौतम आइतबार प्रशासन कार्यालयमा खुसीसाथ  देखिए । उनको खुसीको राज थियो–सहज र छिटोछरितो पालो पाएर काम सकाएर घर फर्किनु ।  दैनिक मजदुरी गर्ने धेरैको त यात्रामा नै एक दिनको आम्दानी सकिने गर्थ्यो ।

आपत्कालीन समयमा मात्र काठमाडौँ जानुपर्छ । “हामीजस्ता गरिबका लागि काठमाडौँ जानु भनेको ठुलो खर्च र समयको बरबादी हो । चन्द्रौटाबाट सेवा पाएपछि राहत महसुस भएको छ । आवेदन गरेको १८ दिनमा राहदानी प्राप्त गरेको छु, खुसी लाग्यो ।”  विजयनगर गाउँपालिका–४ का सेवाग्राही खटिक भन्छन् ।

यस्तै शिवराज नगरपालिका वडा नम्बर १ का खुमराज अधिकारीले नागरिकता बनाउन लाइन बस्नुपर्ने झन्झटबाट मुक्त भएको बताए । विगतका दिनमा सामान्य काम गर्नुपर्दा असहज भएको बताउँदै २-४ दिन धाउनुपर्ने बाध्यता थियो, अब भने हटेको जनाए ।

अधिकारीले थप भने “अब स्थानीय तहमै सेवा पाउँदा निकै सहज भएको छ । पहिले नागरिकता वा सिफारिसका लागि विद्यालय वा काम छाडेर तौलिहवा धाउनु पर्ने अवस्था हुन्थ्यो । अब बिहानै आएर केही घण्टामै काम सकिन्छ । यो व्यवस्था साच्चिकै प्रशंसनीय छ ।” उनले थपे–“समय, पैसा र झन्झट तीनैबाट मुक्ति मिलेको महसुस भएको छ । अझ सेवाहरू यथाशक्य प्रविधिमैत्री र पारदर्शी भए अझ राम्रो हुन्छ ।”

यता प्रशासन कार्यालय प्रमुख घनश्याम न्यौपानेले प्रभावकारी सेवा दिएको बताए । गत आर्थिक वर्ष २०८१/०८२ बैशाखबाट राहदानी सेवा सुरु गरेको बताउँदै असार मसान्तसम्म ८ सय ९ जनाले सेवा लिएको बताए । जसमध्ये ७४ जनाले द्रुत राहदानीको सेवा लिएको उनको भनाइ छ । उनका अनुसार ८ हजार १ सय ९७ राष्ट्रिय परिचयपत्र सम्बन्धी सेवा लिएका छन् ।

यस्तै ४ हजार ५ सय २५ वंशजको नागरिकता लिएका छन्, भने वैवाहिक अङ्गीकृत ३ सय १५, अङ्गीकृत १, जन्मसिद्ध ४ र २ हजार १८८ जनाले नागरिकता लिएको इलाका प्रशासन कार्यालय चन्द्रौटाको तथ्याङ्कमा उल्लेख छ । त्यसै गरी ७५ जनाले नाबालक सम्बन्धी परिचयपत्र लिएका छन्, भने १०५ वटा ठाडो उजुरी परेका छन् ।

८ पटक स्थानीय बजार अनुगमन गरिएको छ, भने ८ सय ६५ वटा विविध प्रमाणित गरिएको कार्यालयको तथ्याङ्कमा उल्लेख रहेको छ । प्रमुख न्यौपानेले थपे “स्थानीय तहमा सेवा केन्द्रित गर्दा नागरिकलाई ठुलो राहत मिलेको छ । हामीले सेवा सरल, छरितो र पारदर्शी बनाउन निरन्तर प्रयास गरिरहेका छौँ । राहदानी, नागरिकता, राष्ट्रिय परिचयपत्र लगायतका सेवा एकै ठाउँबाट उपलब्ध गराउँदा सेवाग्राहीहरू सन्तुष्ट छन् ।”

उनले थपे– “हामी जनशक्ति व्यवस्थापन, सेवा  लिने पालोको स्पष्टता, र जानकारीमूलक सूचना पाटीमार्फत सेवामा पारदर्शिता कायम गरिरहेका छौँ । आगामी दिनमा थप प्रविधि प्रयोग गरेर डिजिटल प्रणालीलाई अझै प्राथमिकता दिने योजना छ ।

जसले सेवाग्राहीको समय र स्रोत अझ बचत हुनेछ ।” न्यौपानेले स्थानीय जनप्रतिनिधि, सुरक्षाकर्मी र अन्य सरोकारवालाको सहकार्यले प्रशासनिक काम अझ सहज र विश्वासिलो बनेको कार्यालय प्रमुख न्यौपानेले बताए ।