खोज

नेपालगन्ज, १९ साउन ।

श्रावण महिनाको पवित्र सोमबारलाई विशेष बनाउँदै नेपालगन्जस्थित बागेश्वरी मन्दिरमा आज भव्य महाआरतीको आयोजना गरिँदै छ ।

‘श्रावण मास विशेष’ का रूपमा सञ्चालन हुने यस शृङ्खलाको आज १३२ औँ संस्करण हो भने आउँदो साउन २६ गते १३३ औँ शृङ्खलासमेत भव्यताका साथ सम्पन्न गरिने भएको छ ।

बागेश्वरी मन्दिर गुठी व्यवस्थापन समितिका अध्यक्ष गोपालप्रसाद अधिकारीका अनुसार यस वर्षको साउन महिनाका बाँकी सोमबारलाई विशेष र ऐतिहासिक बनाउने तयारी गरिएको छ ।

साउन ५ र १२ गते सम्पन्न महाआरतीहरूलाई पनि भक्तजनको उल्लेखनीय सहभागितामा सफल रूपमा सम्पन्न गरिएको थियो । आजको महाआरती साँझ ६ः५० बजेको शुभ साइतमा सुरु हुनेछ ।

महाआरतीमा ७ लाख दीप प्रज्वलन गरिने लक्ष्य लिइएको छ । ‘लक्ष्य वर्ती’ नाम दिइएको यो दीप प्रज्वलनले बागेश्वरी मन्दिर परिसरलाई दिव्य र आध्यात्मिक वातावरणले भरिपूर्ण बनाउने विश्वास गरिएको छ ।

महाआरतीमा बाँके, बर्दियाका विभिन्न मठ–मन्दिरका मठाधीश, सन्त, महन्त तथा भारतको उत्तरप्रदेशस्थित शक्ति पीठ र मठमन्दिरका प्रमुखलाई विशेष रूपमा आमन्त्रण गरिएको छ । यसले कार्यक्रमलाई धार्मिक एवं सांस्कृतिक दृष्टिले अझ समृद्ध बनाउने आयोजकहरूको भनाइ छ ।

१३३ औँ शृङ्खला अर्थात् साउन २६ गतेको अन्तिम सोमबारको महाआरती अझ भव्य बनाइने तयारी समिति सदस्य सुनिलसिंह हमालले जानकारी दिए । त्यो दिन रुद्राभिषेक सम्पन्न गरिनेछ भने प्रत्येक भक्तजनलाई रुद्राक्ष प्रसाद स्वरूप प्रदान गरिनेछ ।

यस्ता धार्मिक क्रियाकलापमार्फत आस्थाको सन्देश फैलाउनुका साथै भक्तजनमा आध्यात्मिक ऊर्जा प्रसार हुने आयोजकहरूको विश्वास छ ।
महाआरती स्थलमा उत्सवको माहौलमा अझ रौनक थप्न शान्त र सौम्य आतिशबाजीसमेत गरिने जानकारी समितिले दिएको छ ।

नाट्टा बाँके च्याप्टरको संयोजनमा दीप प्रज्वलन तथा व्यवस्थापन कार्य अगाडि बढाइएको हो । महाआरती सञ्चालन तथा व्यवस्थापन उपसमितिका संयोजकसमेत रहेका सुनिलसिंह हमालका अनुसार महाआरतीलाई नियमित र व्यवस्थित रूपमा सञ्चालन गरिँदै आएको छ ।

नेपालगन्जमा आयोजित दोस्रो वेष्टन ट्राभल मार्टको अवसर पारेर २०७९ माघ १५ गतेदेखि महाआरती सुरु गरिएको थियो । त्यसयता बागेश्वरी मन्दिर गुठी व्यवस्थापन समिति र नेपालगन्ज उपमहानगरपालिकाको संयोजनमा निरन्तरता दिइँदै आएको छ ।

महाआरती सुरु भएदेखि प्रत्येक सोमवार बागेश्वरी मन्दिर प्राङ्गण भक्तजनहरूको उपस्थितिले खचाखच भरिएको हुन्छ छ । गर्मी याममा करिब ७ बजेतिर महाआरती सुरु गरिने भए पनि भक्तजनहरू साढे ५ बजे देखिनै आउन सुरु गरेका हुन्छन् ।

श्रावणको पवित्रता, बागेश्वरी मन्दिरको आध्यात्मिक ऊर्जा र महाआरतीको भक्ति भावको सङ्गमले सोमबार साँझको वातावरण उज्यालो, शान्त र भक्तिपूर्ण बनाउनेछ भन्ने विश्वास भक्तजनहरूको छ ।