खोज

 काठमाडौं, १८ साउन ।

नेपाल सरकारले प्रहरी ऐन २०१२ मा केही महत्त्वपूर्ण संशोधन गरेको छ, जसअन्तर्गत प्रहरी र सर्वसाधारणबीचको सम्बन्धमा सुधार ल्याउने र संघीय शासन प्रणालीअनुसार कानुनी ढाँचा परिमार्जन गर्ने प्रयास गरिएको छ।

नेपाल राजपत्रमा प्रकाशित सूचनाअनुसार, ऐनको दफा १५ को (ट) बुँदामा उल्लेख गरिएको “स्वास्नी मानिस” भन्ने अपमानजनक तथा असंवेदनशील शब्द हटाइएको छ।

यसअघि सो बुँदामा सर्वसाधारणसँग शिष्ट व्यवहार गर्नुका साथै “स्वास्नी मानिस” र केटाकेटीसँग इज्जतपूर्वक र नम्र व्यवहार गर्नुपर्ने उल्लेख थियो। अहिले भने त्यसलाई परिमार्जन गरी “सेवाग्राही लगायत सबैसँग शिष्ट र मर्यादित व्यवहार गर्ने” भन्ने उल्लेख गरिएको छ।

यसले प्रहरी सेवा समावेशी, समान र सम्मानजनक बन्नुपर्ने जनभावनालाई सम्बोधन गर्ने विश्वास गरिएको छ।

त्यसैगरी, ऐनको दफा ३६ को उपदफा (१) को खण्ड (ख) मा पनि संशोधन गरिएको छ। यस बुँदामा पहिले “क्षेत्रीय प्रहरी विशेष अदालत” भन्ने उल्लेख थियो, जुन अब “प्रदेश प्रहरी विशेष अदालत” मा रूपान्तरण गरिएको छ।

संघीय शासन प्रणालीको कार्यान्वयनपछि “क्षेत्रीय” शब्द अप्रासंगिक बनेको भन्दै त्यसको सट्टा “प्रदेश” शब्द प्रयोग गरिएको हो।

यी कानुनी परिमार्जनहरूलाई समसामयिक आवश्यकतालाई सम्बोधन गर्ने र प्रहरी सेवाको कार्यदिशा सुधार गर्ने प्रयासका रूपमा लिइएको छ। यसले प्रहरी र जनताबीचको सम्बन्ध अझ विश्वसनीय र मर्यादित बन्ने अपेक्षा गरिएको छ।