खोज

दाङ, १८ साउन ।

क्रान्तिकारी कम्युनिस्ट पार्टी नेपालका चार नम्बर ब्युरो सचिव तथा पोलिट व्युरो सदस्य समीर केसीले अहिलेको संसदीय व्यवस्थाको विकल्प नयाँ जनवादी वैज्ञानिक समाजवाद रहेको बताएका छन् ।

क्रान्तिकारी कम्युनिस्ट पार्टी नेपाल जिल्ला कार्यसमिति दाङले आज आयोजना गरेको भ्रष्टाचार विरोधी अभियान अन्तर्गत केसीले नेतृत्व तहबाट नैतिक मुल्य चुक्दै गएको र जनताका आधारभूत आवश्यकतामा ध्यान नपुगेको भन्दै संसदीय व्यवस्थाको विकल्प नयाँ जनवादी वैज्ञानिक समाजवाद स्थापना गर्ने बेला आएको जिकिर गरे ।

देशमा लामो संघर्ष र बलिदानीबाट नयाँ व्यवस्था स्थापना भएपनि अहिले सिंगो व्यवस्था अरुको कब्जामा पर्दा नेपाली जनताको उत्पीडन अन्त्य हुन नसकेको र भ्रष्टाचार, बेथिति मौलाएको बताए ।अहिलेको संसदीय व्यवस्था अन्त्य गर्दै देशमा वैज्ञानिक समाजवाद लागू गर्न सबै जागरुक हुनुपर्ने बेला आएको बताए ।

पार्टीका जिल्ला सचिव ईश्वरी गैरेको अध्यक्षतामा भएको पत्रकार सम्मेलनमा उनले अपवाद बाहेक अधिकांश नेता, कार्यकर्ता भ्रष्टाचारबाट मुक्त हुन नसकेको अवस्थामा देशले निकास पाउन नसकेको, राज्य स्रोतको दोहनबाट विकासमा गम्भीर असर पुगेको स्पष्ट पारे ।

देशलाई सधैका लागि भ्रष्टाचारबाट मुक्त गर्न क्रान्तिकारी कम्युनिस्ट पार्टी नेपालले थालनी गरेको देश व्यापी भ्रष्टाचार विरोधी अभियानले संघीय जनगणतन्त्रको खुड्किलो पार गरी वैज्ञानिक समाजवादको स्थापना गर्ने संकल्पका साथ अघि बढेको बताएका छन ।

उनले वैज्ञानिक समाजवादले मात्रै भ्रष्टाचारको पूर्ण उन्मुलन गर्ने दाबी गरे ।
कार्यक्रममा जिल्ला सचिव गैरेले दाङमा पछिल्लो समयमा भएका विकृति, बेथिति र र भ्रष्टाचारका घटना सार्वजनिक गर्दै घटना प्रति पार्टीको गम्भीर ध्यानाकर्षण भएको बताए ।