खोज

गुल्मी, १८ साउन ।

गुल्मीको प्रसिद्ध धार्मिक स्थल रेसुङ्गामा सुरु भएको साउने मेलामा यति बेला श्रद्धालुहरूको घुइँचो बढ्दै गएको छ । साउन महिनाभर लाग्ने बिशेष मेलामा रेसुङ्गा स्थित महापोखरी र यज्ञ शालामा स्नान र पूजाआजाका लागि टाढा टाढाबाट भक्तजनहरू यहाँ आउने प्रचलन छ ।

विगतका वर्षहरूमा जस्तै यस पटक पनि साउने मेला सुरु भएसँगै रेसुङ्गा धार्मिक पर्यटनका लागि मुख्य गन्तव्य स्थल बनेको छ । धार्मिक, ऐतिहासिक तथा पर्यटकीय दृष्टिकोणले निकै महत्त्वपूर्ण मानिने तपो भूमि रेसुङ्गा पोखरीमा स्नान गरेमा सम्पूर्ण पापहरू नष्ट भएर पुण्य तथा समृद्धि प्राप्त हुने धार्मिक जनविश्वास रहिआएको छ ।

रेसुङ्गा पोखरीमा चारधामबाट ल्याएको जल मिसाइएकाले उक्त पोखरीमा स्नान गरेमा पुण्य प्राप्त हुने धार्मिक विश्वास रहेको रेसुङ्गा संरक्षण समितिका अध्यक्ष सुरेशचन्द्र भुसालले बताए ।

विविध धार्मिक कार्यक्रमहरू सहित सुरु भएको साउने मेलाको अवसरमा रेसुङ्गा संरक्षण समितिले शनिबार भक्ति सङ्गीत प्रतियोगिता आयोजना समेत गरेको थियो । प्रतियोगितामा रातामाट भजन समूह प्रथम, मदाने भजन समूह द्वितीय र छत्रकोट भजन समूह तृतीय बनेका थिए ।

प्रतियोगितामा प्रेम भजन समूह, राधा माधव समिति, सृजनशील महिला समूह, ठूलापोखरा भजन समूह, अर्खले भजन समूह, शिवशक्ति भजन समूह, चन्द्रकोट चक्रेश्वर भजन समूह, बडिगाड भजन समूह वाग्लुङ र रुरुक्षेत्र भजन समूहको सहभागिता रहेको थियो ।

भक्ति सङ्गीत प्रतियोगितामा प्रथम, द्वितीय र तृतीय हुने समूहहरूले क्रमशः ३० हजार २५ हजार र २० हजार रुपैयाँ पुरस्कार प्रदान गरिएको थियो । उक्त प्रतियोगितामा सहभागिता जनाएका समूहलाई सहभागिता स्वरूप पाँच/पाँच हजार रुपैयाँ प्रदान गरिएको थियो ।

साउने मेला अवधिभर रेसुङ्गामा प्रवचन, सामूहिक रुद्री, वेद पाठपरायण, भक्ति सङ्गीत एवं तिज गीत प्रतियोगिता, ग्रहजप, प्रलिगायतका विशेष कार्यक्रम समेत गरिदैं आएको छ ।