खोज

गुल्मी, १८ साउन ।

आज बिहानदेखि परेको अविरल वर्षाका कारण गुल्मीको काली गण्डकी कोरिडोर सडक अवरुद्ध बनेको छ ।

काली गण्डकी कोरिडोर सडक अन्तर्गत काली गण्डकी गाउँपालिका–१ स्थित गरगरेमा सडक माथिबाट ठूला ठूला चट्टान सहितको पहिरो खसेपछि आइतबार दिउसोदेखि उक्त सडक पुर्ण रुपमा अवरुद्ध बनेको जिल्ला प्रहरी कार्यालय गुल्मीले जनाएको छ ।

त्यसै गरी जिल्लाको मुख्य सडक अन्तर्गत रिडी–वामीटक्सार सडक पनि अवरुद्ध बनेको छ । उक्त सडक खण्ड अन्तर्गत सत्यवती गाउँपालिका –६ स्थित डहरे खोलामा पानीको बहाव बढेपछि केही बेर अघिदेखि उक्त सडक पूर्ण रूपमा अवरुद्ध बनेको जिल्ला प्रहरी कार्यालय गुल्मीका सूचना अधिकरी गंगाबहादुर सारुले जानकारी दिएका छन ।

डहरे खोलामा लेदो सहितको बाढी आएपछि सडक पूर्ण रूपमा अवरुद्ध हुँदा त्यस क्षेत्रबाट रिडी हुँदै बुटवल जाने र रिडी हुँदै वाग्लुङको बुर्तिबाङ्सम्म आवतजावत गर्ने सवारी साधनहरू यति बेला बिच बाटोमै रोकिएको प्रहरीले जनाएको छ ।

अवरुद्ध सडक सुचारु गर्नका लागि प्रहरीले जोहाङ्ग खैरेनी र पुर्तीघाटबाट प्रहरी टोली परिचालन गरिसकेको जनाएको छ । तर पानी परिरहेको र वर्षा नरोकिएका कारण सडक सुचारु गर्न समस्या परेको प्रहरी नायव उपरीक्षक सारुले बताए ।

जिल्ला प्रशासन कार्यालय गुल्मीले बर्सादको समयमा खोला तटीय क्षेत्रका वासिन्दाहरुलाई सतर्कता अपनाउँदै सुरक्षित स्थानमा बसोबास गर्न आग्रह गरेको छ । प्रशासनले अत्यावश्यक काम बाहेक मानिसहरूलाई लामो यात्रामा ननिस्कन आग्रह गरेको छ ।

जिल्ला विपद् व्यवस्थापन समितिले गुल्मीले जिल्लाका करिब दुई सय ८० स्थानहरूलाई  बाढी र पहिरोको उच्च जोखिम क्षेत्रमा राखेको छ ।
त्यसै गरी शनिवार अपारन्हदेखि परेको वर्षाको कारण बडिगाड खोलामा पनि पानीको बहाव बढ्दै जान थालेको छ ।