खोज

बुटवल, १८ साउन ।
रुपन्देही डेरी व्यवसायी समितिले सामाजिक उत्तरदायित्वअन्तर्गत तिलोत्तमा–११ स्थित मानव सेवा आश्रममा आश्रितहरूलाई खिर खुवाउने कार्यक्रम सम्पन्न गरेको छ ।

कार्यक्रममा तिलोत्तमा नगरपालिकाका नगरप्रमुख रामकृष्ण खाँडले औपचारिक उद्घाटन गर्दै समाजका कमजोर वर्गप्रति समर्पित प्रेरणादायी कार्य डेरी व्यवसायीबाट भएको बताए । सडकमा बस्ने नागरिकको व्यवस्थापनमा राज्य मात्र होइन, समुदायको पनि उत्तरदायित्व रहने उनको तर्कछ । तिलोत्तमा नगरपालिका सडक मानवरहित नगर घोषणा गरिसकेको भन्दै अब मानव सेवा आश्रममार्फत आश्रितहरूलाई पुनः पारिवारिक पुनर्मिलन गराउँदै उत्पादनशील कार्यमा जोड्ने योजनामा पालिकाले काम गरिरहेको बताए ।

कार्यक्रममा मानव सेवा आश्रमकी केन्द्रीय सदस्य सरु अधिकारीले डेरी व्यवसायीको प्रयासलाई “पुण्य कार्य” भन्दै आभार प्रकट गरिन । कार्यक्रममा बुटवल उद्योग वाणिज्य संघका अध्यक्ष हरिप्रसाद अर्यालले डेरी व्यवसायलाई समाज उपयोगी र मर्यादित पेशा भएको बताए ।

दूधको महत्व बुझाउने र मानवसेवामा सहभागी हुने उद्देश्यका साथ खिर खुवाउने कार्यक्रम आयोजना गरिएको संघका अध्यक्ष विष्णुप्रसाद पाण्डेले बताए ।

समितिका सल्लाहकार तथा पूर्वअध्यक्ष रामकृष्ण शर्मा, समिति उपाध्यक्ष जिवलाल न्यौपाने, सचिव यामप्रसाद शर्माले आश्रित नागरिकहरू जीवित भगवानका रुपमा रहेको भन्दै यस्तो सेवा नै सर्वोच्च धर्म भएको बताए । आश्रममा विभिन्न उमेर समूहका करिब १५० जना आश्रित छन् ।