खोज

रुपन्देही  

लोकतान्त्रिक आदिवासी जनजाती महासंघ रुपन्देहीको दोस्रो अधिवेशन सम्पन्न भएको छ। अधिवेशनले सोहन चौधरीको अध्यक्षतामा ३२ सदस्यीय नयाँ कार्यसमिति चयन गरेको छ।

आज सम्पन्न अधिवेशनको उद्घाटन सत्रलाई सम्बोधन गर्दै महासंघका केन्द्रीय अध्यक्ष पासाङ शेर्पाले नेकपा (एमाले) मुलुकको प्रमुख राजनीतिक शक्ति भएको उल्लेख गरे। उनले आदिवासी जनजाती समुदाय सदैव देशको विकासमा क्रियाशील रहँदै आएको र नेकपा एमालेलाई बलियो बनाउने आधार स्तम्भको रूपमा काम गरेको बताए। साथै, मुलुकको समृद्धि र परिवर्तनमा आदिवासी जनजातिको ठूलो योगदान रहेको उल्लेख गर्दै यसको यथोचित मूल्यांकन आवश्यक भएको धारणा व्यक्त गरे।

कार्यक्रममा लुम्बिनी प्रदेशका पूर्वमुख्यमन्त्री तथा नेकपा एमालेका पोलिटब्युरो सदस्य लिला गिरीले हरेक आन्दोलनमा आदिवासी जनजातीको भूमिका अग्रणी रहेको बताए। उनले जातीय तथा वर्गीय विभेद अन्त्य गर्न नेकपा एमाले निरन्तर प्रयासरत रहेको समेत स्पष्ट पारे।

अधिवेशनमा महासंघका केन्द्रीय उपाध्यक्ष ज्ञानेन्द्र पुन, सचिव हिरु राना, नेकपा एमाले केन्द्रीय अनुशासन आयोग सदस्य तुलसी चौधरी, लुम्बिनी प्रदेश उपाध्यक्ष भोजप्रसाद श्रेष्ठ, भूमि आयोग रुपन्देही अध्यक्ष कुमार थापा लगायतका नेताहरूले पनि मन्तव्य दिएका थिए।

नवगठित कार्यसमितिको अध्यक्षमा सोहन चौधरी चयन भएका छन् भने उपाध्यक्षमा सदिप थापा, महिला उपाध्यक्षमा सीता जोशी, सचिवमा नेतन गुरुङ, महिला उपसचिवमा सुनीता राजकोटी, उपसचिवमा टेकबहादुर राना र कोषाध्यक्षमा हेमबहादुर थापा चयन भएका छन्। कार्यसमितिको कार्यकाल दुई वर्षको रहनेछ।

लोकतान्त्रिक आदिवासी जनजाती महासंघ नेकपा एमालेको जनवर्गीय संगठनका रूपमा देशभर क्रियाशील रहेको छ।