पाल्पा, १७ साउन ।
पाल्पामा गत आर्थिक वर्ष २०८१/०८२ मा राजस्व सङ्कलन बढेको छ । अघिल्लो आर्थिक वर्षको तुलनामा ५ करोड २८ लाख ३७ हजार ६ सय ८० रुपैयाँले राजस्व सङ्कलन बढेको हो ।
करदाता सेवा कार्यालय पाल्पाका अनुसार गत आर्थिक वर्ष ६० करोड ८१ लाख ९५ हजार ४ सय ७० राजस्व सङ्कलन भएको छ । कार्यालयले ७० करोड २२ लाख ७२ हजार ९ सय ७० राजस्व सङ्कलनको लक्ष्य राखेको थियो । उक्त लक्ष्य नजिक रहेर कार्यालयले ८७ प्रतिशत राजस्व सङ्कलन गरेको हो ।
उसले आर्थिक वर्ष २०८०/०८१ मा ५५ करोड ५३ लाख ५७ हजार ७ सय ९० राजस्व सङ्कलन गरेको थियो । सङ्कलन भएको राजस्व लक्ष्यको ७५ प्रतिशत रहेको थियो ।
आर्थिक वर्ष २०८१/०८२ मा आयकरतर्फ ३२ करोड ९० लाख ५२ हजार २ सय ३०, मूल्य अभिवृद्धि करतर्फ २६ करोड ९४ लाख २४ हजार २ सय ४० र अन्तःशुल्कतर्फ ९७ लाख १९ हजार राजस्व सङ्कलन गरिएको कार्यालयका प्रमुख तथा कर अधिकृत सन्तोष सुवेदीले बताए ।
अघिल्लो वर्षको तुलनामा गत वर्ष राजस्व सङ्कलनमा करिब १० प्रतिशत वृद्धि भएको सुवेदीको भनाइ छ । उनका अनुसार चालु आर्थिक वर्षको पहिलो महिनामै उत्साहजनक रूपमा करदाताहरूबाट कर सङ्कलन भएको थियो ।
अघिल्लो वर्षदेखि कर शिक्षा प्रणालीलाई थप प्रभावकारी बनाउँदै लगेका कारण राजस्वमा वृद्धि हुँदै गएको कर अधिकृत सुवेदीले बताए ।
उनले भने,‘हामीले ठाउँ –ठाउँमा पुगेर कर शिक्षा दिँदै आएका छौँ, आर्थिक ऐनले प्रदान गरेका छुट सुविधाहरूको व्यापक प्रचार र जिल्लामा गत आर्थिक वर्ष भन्दा बढी पुँजीगत खर्च हुनुले पनि राजस्व सङ्कलनमा वृद्धि भएको हो ।’
कर सम्बन्धी जनचेतना बिस्तार भएर पनि व्यापारी/व्यवसायी क्रमशः करको दायरामा आउने क्रम बढेको प्रमुख सुवेदीले बताए । राज्यलाई कर तिर्नुपर्छ भन्ने मान्यताको विकास गराउन कार्यालयले जिल्लाका वडा तहमा पुगेर कर शिक्षा प्रदान गरेको थियो ।
करको दायरामा आएपछि कमाई र पेसालाई कानुनी वैधता प्राप्त हुने र त्यसको माध्यमबाट बैङ्किङ कारोबार गर्न सहज हुने भएकाले जनता स्वतःस्फूर्त कर दर्ता गर्न आउने क्रम बढेको उनले बताए ।
केही करदाताहरू अझै पनि शिक्षाको कमीका कारण करको दायरामा आउन नसकेकाले उनीहरूलाई स्थानीय सरकारसँग समन्वय गरेर ल्याउने काम कार्यालयले गर्दै आएको छ ।
कार्यालयबाट गत वर्ष ७ सय ८० व्यवसाय दर्ता भएका छन् । यहाँ ३ सय ६२ व्यवसाय बन्द भएको कार्यालयले जनाएको छ । कार्यालयले ३ हजार ४ सय ८१ व्यक्तिगत पान वितरण गरेको छ भने एक हजार १ सय ६८ करदाताले अन्तः शुल्क नवीकरण गरेका छन् ।
कार्यालयबाट अनलाइन सिस्टमको व्यवस्थापन भएकाले करदाताहरूले अनलाइनबाटै आफ्नो मासिक, त्रैमासिक, कारोबारहरूको विवरण बुझाउन सकिने, बैङ्कबाट समेत राजस्व तिर्न मिल्ने व्यवस्था भएपछि व्यवसायी तथा उपभोक्तालाई सहजता भएको कर अधिकृत सुवेदीले बताए ।
अझै करको दायरामा आउन नसकेका व्यवसायी फर्मलाई पनि करको दायरामा ल्याउन उनीहरूलाई वैधानिक रूपमा व्यापार व्यवसाय गर्न प्रोत्साहन गर्ने योजना करदाता सेवा कार्यालयको रहेको छ ।
२० मंसिर २०८२, शनिबार
